Интерни истражувања на Meta покажале дека корисниците кои не користат Facebook чувствуваат помалку депресија и анксиозност. Според американските обвинители, Meta ги сокрила овие докази.
Meta со години прикривала внатрешни докази дека Facebook може да предизвика влошување на менталното здравје кај корисниците, се наведува во неодамна објавени судски документи кои се дел од голема тужба поднесена од американски училишни окрузи против Meta, Google, TikTok и Snapchat.
Како што пренесува Reuters, Meta во 2020 година спровела истражување под името „Project Mercury“ во соработка со Nielsen, голема меѓународна истражувачка компанија. Истражувањето покажало дека корисници кои престанале да користат Facebook една недела чувствувале помала анксиозност, помалку осаменост и покажувале пониски нивоа на депресија.
Наместо да ги објави резултатите, Meta нагло го прекинала истражувањето, тврдејќи интерно дека наодите биле „контаминирани од медиумскиот наратив“. И покрај тоа, поединечни вработени предупредувале дека заклучоците се валидни, споредувајќи ја ситуацијата со практиките на тутунската индустрија која со години ја сокривала штетноста на цигарите.
Но, обвиненијата не застануваат само на прикривање на резултатите. Податоци од внатрешни документи наводно покажуваат дека Meta дизајнирала безбедносни функции за младите така што да бидат неефикасни, толерирала екстремно висок праг за отстранување профили поврзани со трговија со луѓе и со години го одложувала делувањето против педофили и злоупотребувачи поради грижа за растот на социјалната мрежа.
Дополнително, во тужбата е цитирана и порака од Марк Закерберг од 2021 година во која наводно тврди дека безбедноста на децата не му е главен приоритет, бидејќи е повеќе насочен кон изградба на метаверзумот. Поради тоа, тој ги игнорирал барањата за дополнително финансирање на безбедносните оддели во рамките на Facebook.
Како што и се очекуваше, Meta ги отфрли сите овие обвиненија. Портпаролот на компанијата, Енди Стоун, тврди дека спорното истражување било методолошки неисправно и дека обвиненијата се засноваат на „селективно издвоени цитати и погрешни интерпретации“. Тој истакнува дека Meta повеќе од 10 години вложува големи напори во безбедноста на младите корисници.
Целиот случај повторно ќе биде разгледан на судско рочиште на 26 јануари 2026 година.
