Windows 11 може да ги продолжи активностите започнати на Android телефон директно од taskbar-от, благодарение на новата функција заснована на Link to Windows.
Microsoft воведува нова cross-device опција во Insider Preview Build 26220.7271, овозможувајќи активностите што се покренати на Android телефон автоматски да се продолжат на Windows 11 компјутер. Поддржаните апликации, како M365 Copilot алатките, можат да го префрлат работењето на документи или веб-сесии директно на PC со еден клик. Ова ја проширува претходно воведената функционалност, кога единствено Spotify ја поддржуваше можноста за продолжување на репродукцијата.
Системот функционира преку апликацијата Link to Windows и Microsoft Continuity SDK-то, кои создаваат мал пакет метаподатоци за тоа што корисникот работи и го испраќаат во Windows околината.
Новата функција овозможува продолжување на работата од Android телефон на Windows 11 компјутер
Кога Windows ќе ги прими податоците преку Cross Device Experience Host, ја стартува соодветната апликација или го отвора содржинскиот линк во прелистувач. Документите од M365 Copilot се отвораат локално ако е инсталиран Office, а во спротивно се отвораат онлајн. Offline фајловите не се поддржани, бидејќи немаат URI што Windows може да го преземе.
Функцијата засега работи само на телефони од неколку брендови: Samsung, Honor, Huawei, Oppo и Vivo, бидејќи интеграцијата на Continuity SDK-то е ограничена и OEM производителот мора сам да ја овозможи. Без активна Link to Windows апликација во позадина, спарен телефон и дозволи за пренос на активности, известувањето за продолжување нема да се појави. Microsoft нагласува дека станува збор за ограничена API функција до која имаат пристап само одбрани партнери.
Тестовите покажуваат дека функцијата сè уште работи прилично нерамномерно и е тешко да се натера да функционира сигурно, но претставува обид Windows да добие сопствен екосистем сличен на Apple Handoff системот. Проблем и понатаму е фрагментацијата на Android платформата и недостигот од доследна OEM поддршка. Исто така, iPhone уредите се целосно исклучени од оваа функција, бидејќи iOS апликациите моментално не можат да го користат Continuity SDK-то.
Microsoft планира да ја прошири листата на поддржани производители и да го поедностави процесот за програмери, но засега функцијата е достапна само за Insider корисниците во Dev и Beta каналите, без најава кога ќе стане достапна за стандардните Windows 11 инсталации, пишува Windows Latest.
