Новите модели Sony PS5 CFI-2100/2200 модели сега користат PS5 Pro елементи околу APU чипот кои го спречуваат истекувањето на течниот метал и потенцијално го решаваат реткиот, но сериозен недостаток
Sony без голема најава направи значајна измена во внатрешниот дизајн на конзолата PlayStation 5. Откако во претходните години се појавија случаи на оштетување на PS5 уредите поради истекување на течниот метал што служи за ладење на APU чипот, компанијата реши во новите модели да го примени истото решение што првично беше развиено за PS5 Pro.
Како што е познато, PS5 користи течен метал наместо класична термална паста поради подобра дисипација на топлина. Но токму таа предност носеше и ризик: кај поединечни примероци течниот метал излегувал од површината на чипот, крател контакти и целосно ја онеспособувал конзолата.
Sony го решава проблемот со истекување на течниот метал кај најновите PS5 верзии
PS5 Pro го реши овој проблем така што Sony додаде специјални жлебови и физичка бариера околу APU модулот, спречувајќи течниот метал да ја премине ивицата и да предизвика штета.
Според најновото видео и фотографии споделени од @Modyfikator89, токму овој PS5 Pro дизајн сега се наоѓа и во стандардните PS5 модели со ознака CFI-2116, како и во сериите CFI-2100/2200. Ова значи дека Sony активно работи на елиминирање на потенцијалниот ризик и дека новите примероци од стандардната конзола имаат подобрена заштита.
Некои пазари сè уште ја немаат добиено новата ревизија. На купувачите им се препорачува да внимаваат на бројот на моделот при купување, доколку сакаат конзола со најновата заштита.
Иако случаите на истекување течен метал не се масовни и најголемиот дел од корисниците на PS5 никогаш нема да се соочат со овој проблем, експертите напоменуваат дека доколку се појави прегревање, најдобро е да се контактира официјалниот Sony сервис, кој во такви ситуации обично нуди поправка или замена.
