Samsung и Largan ќе произведуваат нови телефото модули за Tecno телефоните, вклучително и континуиран 1x–9x оптички зум.
Samsung, покрај тоа што произведува телефони и таблети, исто така изработува и клучни компоненти за камери, а сега првпат ќе развие напреден објектив со континуиран оптички зум за паметни телефони. Станува збор за две нови телефото технологии што ги најави Tecno, а кои ќе ги произведуваат Samsung и тајванскиот Largan.
Според најавата, Dual-Mirror Reflect Telephoto модулот ќе биде подготвен за телефони веќе следната година. Овој систем користи две огледала за фокусирање на светлината, а притоа е 50% помал од класичните зум-објективи. Создава и препознатлив „прстенест“ боке-ефект, како кај рефлексните објективи за DSLR и mirrorless камери. Неговиот недостаток е губење на еден степен на светлина, што значи преполовено количество светлина на сензорот.
Samsung влегува во развој на вистинска континуирана оптика за паметни телефони
Вториот модул, Freeform Continuum Telephoto, претставува вистинска револуција. Станува збор за перископски објектив со континуиран оптички зум 1x–9x, многу сличен на пристапот на Sony и LG.
Бидејќи примарната камера преку овој модул го покрива целиот опсег на зумирање, уредите повеќе нема да имаат потреба од дополнителни телефото сензори. Предностите вклучуваат покомпактен дизајн, помалку прекини во зум-опсегот и поголема флексибилност при кадрирање.
Сепак, предизвик останува острината, бидејќи Sony Xperia 1 VII, која користи слична технологија, има забележливо послаба дефиниција на сликата во споредба со фиксните телефото објективи. Доколку Tecno и Samsung го решат тој проблем, пазарот би можел да добие целосно нова генерација телефото системи кај флегшип телефоните.
Првите модули пристигнуваат во текот на следната година, додека напредниот Freeform систем ќе биде подготвен за комерцијална употреба дури за околу една година, пренесува Sammobile.
