Нови AI модели со отворен код ќе помогнат да се намали времето, работата и ресурсите што нуклеарната индустрија ги троши на пребарување документи поврзани со работењето, одржувањето и регулативите.
Развојот на вештачка интелигенција специјализирана за нуклеарната индустрија се потпира на моќта на еден од најмоќните суперкомпјутери во светот – Frontier, кој се наоѓа во американската Национална лабораторија Оук Риџ (ORNL). Стартапот Atomic Canyon на него ги тренираше своите ВИ модели со цел да создаде алатка што го забрзува пребарувањето и анализата на комплексна техничка документација поврзана со лиценцирање, одржување и безбедносни процедури во нуклеарните постројки.
Atomic Canyon ја разви платформата Neutron користејќи 20.000 GPU-часови на Frontier – првиот егзаскалeн суперкомпјутер со повеќе од 37.000 AMD Instinct MI250X GPU-а и врвни перформанси од 2 ексафлопа. Оваа моќ овозможи тренирање на FERMI моделите – специјализирани системи за sentence embedding кои на зборови и фрази им доделуваат нумерички вектори за подобро разбирање на нуклеарниот жаргон и контекстот.
Вградување реченици
FERMI моделите, кои се со отворен код и достапни на Hugging Face, се тренирани врз NRC ADAMS базата со 3 милиони документи и 53 милиони страници. Тие се разликуваат од генеративните LLM модели затоа што се фокусираат на пребарување и повлекување документи, со што се минимизираат „халуцинациите“ и се обезбедуваат точни резултати од технички извештаи, документи за одржување и регулаторни прописи. Дополнително, Frontier овозможи и двојно поголем влез за обработка на поголеми документи, со што процесот на индексирање е преполовен, а системот е двојно забрзан.
Neutron функционира зад firewall, а платформата се интегрира со локални бази, на пример со 2 милијарди страници во Diablo Canyon. ORNL и Atomic Canyon договорија понатамошен развој, вклучувајќи и комбинирање на FERMI со LLM модели за автономна анализа.
