Станува збор за уште една апликација која овозможува просторот околу отворот на предната камера да се искористи на различни начини, па така е можно да се извршуваат различни активности кога просторот околу камерата ќе се кликне повеќепати, ќе се помине со лизгање лево или десно преку него и слично
Notch-Touch е уште една апликација наменета за Android телефони која се обидува да искористи еден од често занемарените елементи кај паметните телефони – просторот околу отворот на предната камера, претворајќи го во допирна зона преку која може да се извршуваат различни, однапред дефинирани активности.
Во суштина, просторот околу предната камера се претвора во невидливо копче за кое може да се постават разновидни функции, како што се стартување на камерата, правење снимка од екранот, отворање на поставките на паметниот телефон, вклучување или исклучување на блицот, како и стартување на одредена апликација по избор.
Притоа, достапни се неколку различни гестови – просторот околу отворот може да се допре еднаш, двапати или трипати, да се лизга лево или десно, или да се допре и задржи, а за секоја од овие акции може да се додели една од веќе споменатите функции.
За апликацијата да функционира онака како што се очекува, потребно е да ѝ се доделат соодветни дозволи, како и да се дефинира позицијата и големината на оваа специјална допирна зона. Бесплатната верзија прикажува реклами, но тие може да се отстранат со еднократно плаќање од 1,19 евра.
