OnePlus веќе делумно го најави OnePlus 15R минатиот месец, но сега конечно се познати сите спецификации и детали за цената.
Беше јасно дека 15R ќе ги дели поголемиот дел од клучните спецификации со моделот OnePlus Ace 6T, кој е ексклузивен за Кина, но сепак доаѓа со неколку помали разлики.
Додека Ace 6T има огромна батерија со капацитет од 8.300 mAh, 15R се напојува со батерија од 7.400 mAh, што и понатаму е прилично импресивно. Таа користи силициум-јаглеродна (Si-C) анода и поддржува нешто побавно жично полнење од 80 W, во споредба со брзините од 100 W кај моделот Ace 6T.
OnePlus 15R доби надградена камера, но само на предната страна, каде што се наоѓа 32 MP сензор, наспроти 16 MP единицата кај смартфонот Ace 6T. Друга голема промена е на софтверската страна, каде што 15R работи со OxygenOS 16, базиран на Android 16, со целосниот OnePlus AI пакет.
Останатиот дел од клучните спецификации кај моделот 15R е идентичен со Ace 6T. Станува збор за 6,83-инчен AMOLED екран со FHD+ резолуција и променлива брзина на освежување до 165 Hz, заштитен со Gorilla Glass 7i стакло. Телефонот е опремен со процесорот Snapdragon 8 Gen 5 од Qualcomm и е во комбинација со 12 GB LPDDR5X Ultra RAM меморија, како и 256 или 512 GB UFS 4.1 внатрешна меморија.
На задната страна се наоѓа двојна камера, предводена од главна камера од 50 MP (IMX906) со жаришна должина еквивалентна на 24 mm и оптичка стабилизација на сликата. Нејзе ѝ се придружува ултраширок објектив од 8 MP со видно поле од 112 степени, еквивалентно на 16 mm. Моделот 15R доаѓа и со целосен пакет на заштита според стандардите IP66, IP68, IP69 и IP69K.
OnePlus 15R ќе биде достапен во боите Charcoal Black и Mint Breeze. Цената за основниот модел со 12/256 GB изнесува 699 евра / 649 фунти, додека верзијата со 12/512 GB чини 830 евра.
Преднарачките се во тек, а продажбата е планирана да започне на 15 јануари.
Нарачките за моделот со 12/512 GB преку интернет-страницата OnePlus.com до 21 јануари добиваат попуст, а купувачите дополнително добиваат бесплатен полнач од 120 W и пар слушалки OnePlus Buds 4 или OnePlus 15R Sandstone магнетна футрола.
