Во пресрет на Светското фудбалско првенство 2026 година, FIFA и Netflix најавуваат фудбалска симулација што ќе ги претвори паметните телефони во контролери, а дневните соби и телевизорите во виртуелни стадиони.
Светската фудбалска организација FIFA официјално ја потврди соработката со платформата Netflix Games на развојот на нова фудбалска симулација. Играта, која ја развива и издава студиото Delphi Interactive, ќе биде достапна ексклузивно за претплатниците на Netflix во текот на летото 2026 година. Ова е темпирано точно со почетокот на Светското фудбалско првенство што ќе се одржи во САД, Канада и Мексико. Овој потег означува значаен пресврт во дигиталната стратегија на FIFA по прекинот на долгогодишната соработка со Electronic Arts.
Во официјалната објава проектот е опишан како „повторно осмислена фудбалска симулација фокусирана на пристапноста и емоцијата на турнирот“. За разлика од комплексните симулации на кои играчите се навикнати на конзолите, верзијата за Netflix ќе биде оптимизирана за брзо учење и интуитивна игра. Целта е да им се овозможи на милиони навивачи ширум светот да се вклучат во играта „со еден допир на копче“, без потреба од скап хардвер или претходно искуство со слични симулации.
Технолошка иновација
Техничката страна на проектот се потпира на сè пошироката инфраструктура на Netflix за игри. Корисниците ќе можат да ја стартуваат играта директно на своите телевизори, додека паметните телефони ќе им служат како безжични контролери. Покрај можноста за индивидуално играње, најавена е и опција за онлајн играње што ќе овозможи натпреварување со пријателите.
Ален Таскан, претседател на одделот за игри во Netflix, истакна дека Светското првенство 2026 ќе биде клучен културен настан на годината и дека нивната платформа сака да го врати фудбалот кон неговите корени преку забава достапна за сите.
Доаѓањето на лиценцирана FIFA игра на стриминг платформа би можело значително да ја промени пазарната динамика на спортските видеоигри. Бидејќи играта ќе биде вклучена во стандардната претплата на Netflix без дополнителни трошоци, се очекува голем интерес од публика која традиционално не купува спортски симулации за конзоли.
Иако најавата предизвика голем интерес во јавноста, организаторите најавуваат дека целосната презентација на можностите на играта, како и нејзиниот официјален наслов, ќе бидат објавени дури на почетокот на 2026 година. Исто така, сè уште не се познати ниту техничките предуслови, но беше нагласено дека играта нема да биде достапна на сите телевизори и во сите земји, туку ќе постојат одредени ограничувања.
