Според најновиот извештај на IDC, Huawei во првите три квартали од годината ја презеде водечката позиција на глобалниот пазар на паметни часовници. На второ место е Xiaomi, на трето Apple, а на четврто Samsung.
Глобалниот пазар на уреди што се носат на зглоб, категорија која ги опфаќа паметните часовници и фитнес-нараквиците, достигна повеќе од 150 милиони испорачани единици во првите три квартали од оваа година. Според новиот извештај на International Data Corporation (IDC), тоа претставува раст од 10 проценти во споредба со истиот период лани.
Најголемиот дел од пазарот и понатаму го заземаат паметните часовници, од кои се испорачани речиси 120 милиони, со годишен раст од 7,3 проценти. Уште посилен раст бележат ценовно подостапните фитнес-нараквици, чија побарувачка пораснала за 21,3 проценти, на вкупно 32,86 милиони испорачани уреди.
Huawei во тие три квартали се наметна како водечки светски производител на паметни часовници, со вкупно 28,6 милиони испорачани уреди. Голем дел од овој резултат е остварен на домашниот кинески пазар, каде што се продадени 20,8 милиони уреди, додека од IDC истакнуваат дека компанијата интензивно работи на зајакнување на присуството и на странските пазари.
Второто место го држи Xiaomi, кој воедно е и најбрзорастечкиот производител меѓу петте најголеми. Xiaomi испорача 27,9 милиони уреди, главно благодарение на силната побарувачка за поповолни модели како Xiaomi Smart Band 10 и Redmi Watch, со добри резултати не само во Кина, туку и во Југоисточна Азија и Јужна Америка.
Apple го зазеде третото место на глобално ниво, додека во Кина е четврти. За разлика од конкуренцијата, Apple се фокусира исклучиво на модели од средната и повисоката ценовна класа. Оваа година компанијата се насочи кон унапредување на поврзаноста, а токму тоа, според IDC, ќе биде еден од клучните двигатели на растот во следната година, заедно со интеграцијата на AI-апликации и понапредни функции за следење на здравјето.
Samsung, кој глобално се наоѓа на четвртото место, во текот на првата половина од годината бележеше пад на испораките, но претставувањето на новите модели од серијата Galaxy Watch 8 во третиот квартал го смени трендот и донесе раст на годишно ниво во првите девет месеци од оваа година.
