Поради проблеми во раните фази на производството, аналитичарот Минг Чи Куо предвидува дека iPhone Fold ќе биде претставен до крајот на следната година, но дека ќе стане достапен за купување дури во 2027 година.
Apple следната година би можел да зачекори на пазарот на склопиви мобилни телефони, но првиот ваков iPhone можеби нема веднаш да стигне до купувачите. Како што дознава реномираниот аналитичар Минг-Чи Куо, Apple навистина планира да го претстави својот iPhone Fold во втората половина на 2026 година, но почетокот на испораките би можел да се одложи сè до 2027 година.
Куо наведува дека уредот се соочува со проблеми во раната фаза на производството, при што голем дел од првите примероци не можат да се искористат поради грешки, како и со дополнителни, засега неименувани предизвици пред масовното производство. Поради тоа се очекува дека достапноста на уредот во текот на 2026 година ќе биде ограничена, и покрај големиот очекуван интерес на пазарот.
Според сè уште неофицијални информации, iPhone Fold треба да има флексибилен екран без видлив набор од 7,58 инчи, како и надворешен екран од 5,8 инчи. Исто така, се наведува дека ќе има и поголема батерија од онаа на iPhone 17 Pro Max.
И покрај можните доцнења, одредени аналитички куќи уште сега предвидуваат дека влегувањето на Apple во овој сегмент значително ќе го поттикне растот на пазарот на склопиви мобилни телефони.
