Xiaomi официјално потврди дека новиот флегшип модел Xiaomi 17 Ultra ќе биде претставен во Кина на 25 декември. Компанијата преку објава на Weibo го откри и изгледот на уредот, како и боите во кои ќе биде достапен.
Според објавените тизери, Xiaomi 17 Ultra ќе доаѓа во три бои – Starry Green, бела и црна.
Особено се издвојува новата Starry Green варијанта, чија задна страна содржи минерални честички што му даваат на телефонот металик финиш. На задниот дел е сместена тројна камера, а дизајнот потврдува и рамен екран, сегментирани копчиња за контрола на јачината на звукот, како и куќиште со дебелина од 8,29 mm.
Иако Xiaomi сè уште нема објавено целосни технички спецификации, се очекува 17 Ultra да биде придвижуван од процесорот Snapdragon 8 Elite Gen 5.
Според досегашните неофицијални информации, телефонот би можел да има 1-инчен главен сензор на камерата, 200 MP перископски телефото објектив, како и унапредена Leica оптика.
По кинеската премиера, Xiaomi 17 Ultra се очекува да пристигне и на глобалниот пазар во наредните месеци.
