LG Gram Pro 17 и Gram Pro 16 ќе користат нов ултралесен материјал кој не ја компромитира издржливоста.
LG ги претстави Gram Pro лаптопите за 2026 година, кои целосно ќе бидат претставени на CES 2026 саемот, меѓу кои и преносниот компјутер за кој компанијата тврди дека е најлесниот 17-инчен RTX лаптоп во светот. Моделите LG Gram Pro 17 (17Z90UR) и Gram Pro 16 (16Z90U) ќе воведат нов ултралесен „Aerominum материјал“, развиен од LG, чија цел е да ја намали тежината на лаптопот, а воедно да ја зајакне цврстината и отпорноста на гребење.
LG Gram Pro 17 ќе има екран со резолуција од 2.560 x 1.600, во комбинација со Nvidia RTX 5050 лаптоп графичка картичка со само 8 GB VRAM. LG тврди дека и покрај тоа ќе обезбеди „доволни перформанси за графички интензивни задачи, креација на содржини и гејминг“. Сепак, нема да можете да ги извршувате повеќето модерни игри со максимални поставки и прифатлива флуидност, па затоа не треба да го сметате Gram Pro 17 за наменски гејминг лаптоп. LG сè уште не открива колку точно ќе тежи Gram Pro 17, но наведува дека при лансирањето ќе биде достапен исклучиво на американскиот пазар.
Сè уште не е позната ниту тежината на Gram Pro 16, кој ќе има 2.880 x 1.800 OLED екран и најнови Intel Core Ultra процесори, но LG на сличен начин тврди дека ова ќе биде „најлесниот 16-инчен лаптоп во својата класа што нуди и локална и cloud-базирана AI“. Цената и датумите на излегување за двата лаптопи сè уште не се објавени, но можно е LG да ги задржува овие информации до официјалното претставување на CES следната недела.
