Корисниците на паметни телефони кои чувствуваат носталгија за старите добри денови на BlackBerry сега можат повторно да го доживеат тоа искуство со Clicks Communicator.
Брендот Clicks кој стои зад Clicks Keyboard за iPhone, го најави новиот смартфон Communicator пред CES 2026. Тој доаѓа со физичка тастатура чувствителна на допир, комбинирана со 4,03-инчен AMOLED екран со резолуција од 1080 × 1200 пиксели.
Смартфонот работи на Android 16 со прилагоден Niagara Launcher, кој овозможува пристап исклучиво до апликации за пораки и продуктивност, како WhatsApp, Slack, Telegram, Gmail и слично.
Има и светло за нотификации поставено околу копче на десната страна, наречено Signal Light. Корисниците можат да доделат различни бои и шеми за пораки од различни апликации или контакти.
Ова копче може да се користи и за диктирање пораки преку глас или за брзи гласовни белешки. Како што беше спомнато, физичката тастатура е чувствителна на допир и може да се користи за скролање низ пораки, веб-страници и за навигација низ интерфејсот.
Clicks Communicator има една задна камера од 50 MP со OIS и LED блиц, како и предна селфи камера од 24 MP.
Уредот доаѓа со силициум-јаглеродна батерија од 4.000 mAh со поддршка за Qi2 безжично полнење и USB Type-C порт. Исто така, има 3,5 mm приклучок за слушалки, dual SIM со 5G конективност, Bluetooth 5.4, NFC и dual-band Wi-Fi 6. Нуди 256 GB внатрешна меморија со можност за проширување преку MicroSD картичка.
Телефонот тежи 170 грама и е дебел 12 mm. Дополнителни карактеристики вклучуваат физички „kill switch“ на рамката, прилагодливо Clicks копче за кратенки и 4 nm MediaTek процесор. Communicator поддржува и заменливи задни капаци, достапни во повеќе бои.
Clicks Communicator е планирано да започне со испорака подоцна оваа година и ќе чини 499 долари. Сепак, раните купувачи можат уште сега да го резервираат уредот за 399 долари. Телефонот ќе биде достапен во Clover, Onyx и Smoke бои.
