Motorola на саемот CES 2026 претстави нови мобилни телефони, меѓу кои и својот прв преклоплив смартфон во форма на книга, но пристигнаа и неколку други уреди.
Razr Fold има 8,09-инчен LTPO внатрешен екран со 2K резолуција, кој е надополнет со 6,56-инчен надворешен екран. Поседува тројна задна камера составена од 50 MP Sony LYTIA главен сензор, 50 MP ултраширока камера и 50 MP перископска телефото камера со 3x оптички зум, со поддршка за Dolby Vision снимање. За селфи фотографии се користат 32 MP камера на предниот екран и 20 MP камера на внатрешниот екран.
Кога ќе се појави во продажба, преклопниот смартфон ќе биде достапен во боите Pantone Blackened Blue и Pantone Lily White.
Овој смартфон носи и AI функции како Catch Me Up и Next Move, а поддржува и Moto Pen Ultra пенкало. Motorola не откри други спецификации за Razr Fold.
Цената, деталите за достапноста и комплетните спецификации за Razr Fold ќе бидат објавени подоцна.
По Razr Fold, Motorola го претстави и Signature – првиот телефон во рамки на новата ултра-премиум Signature серија на брендот.
Motorola Signature има 6,8-инчен AMOLED екран со стапка на освежување од 165 Hz, Full HD+ резолуција, врвна осветленост до 6.200 нита и заштита Gorilla Glass Victus 2. Панелот поддржува и Dolby Vision и HDR10+, а доаѓа со Pantone Color и SkinTone сертификати.
Телефонот има тројна задна камера со 50 MP Sony Lytia 828 сензор со оптичка стабилизација на сликата и бленда f/1.6. Исто така има 50 MP ултраширока камера со агол на гледање од 122 степени и поддршка за макро снимки, како и 50 MP Sony Lytia 600 перископски телефото објектив со 3x оптички зум. За селфи фотографии, телефонот има 50 MP Sony Lytia 500 сензор со автофокус.
Signature го придвижува Snapdragon 8 Gen 5 процесор, во комбинација со до 16 GB LPDDR5X RAM и 1 TB UFS 4.1 меморија. Телефонот работи на Android 16 и доаѓа со неколку Moto AI функции. Motorola ветува седум години ажурирања на оперативниот систем и безбедносни надградби.
Моделот се напојува со силициум-карбонска батерија со капацитет од 5.200 mAh, со поддршка за жично полнење од 90W и безжично полнење од 50W. Има и поддршка за обратно безжично полнење од 10W и жично реверзибилно полнење од 5W.
Останатите спецификации вклучуваат IP68 и IP69 сертификати, MIL-STD-810H стандард, скенер за отпечаток од прст во екранот, GPS, двојни звучници со Sound by Bose технологија, поддршка за Dolby Atmos и три микрофони. Дебелината на Motorola Signature изнесува 6,99 mm, а тежината е 186 g.
Ќе биде достапен за купување во боите Pantone Carbon и Pantone Martini Olive.
На настанот Lenovo Tech Day 2026, одржан за време на CES, Motorola го претстави и Razr 60 FIFA World Cup 26 Edition – модел од ограничена серија за фановите на FIFA. Овој „школка“ телефон има мека текстурирана задна страна со шари поврзани со Светското првенство на FIFA.
Достапен е во зелена боја и нуди исти спецификации како стандардниот Razr 60. Корисниците ќе добијат и прилагодени позадини, мелодија на ѕвонење со FIFA тема и FIFA воден жиг за фотографии.
Телефонот ќе биде достапен само во САД и Канада од 12 февруари, по цена од 700 долари.
Но, тоа не е сè, бидејќи пристигна и нов Moto Watch, кој го претставува партнерството на Motorola со Polar и е наменет за следење на фитнесот и здравјето. Паметниот часовник доаѓа со кружен OLED екран од 1,43 инчи, заштитен со Gorilla Glass 3. Има PPG сензор, Bluetooth 5.3, двофреквентен GPS и IP68 заштита.
Часовникот е достапен во алуминиумска изведба со круна од не’рѓосувачки челик и Pantone ремчиња. Се наведува дека ќе нуди до 13 дена траење на батеријата без вклучен always-on екран. Овој часовник нуди континуирано следење на срцевиот ритам, анализа на спиењето и поддржува повеќе режими на вежбање.
Moto Watch ќе биде достапен на одбрани пазари низ Азија, Европа, Блискиот Исток, Латинска Америка и Океанија, со опции за ремчиња од не’рѓосувачки челик, силикон или soft-luxe.
Motorola го претстави и Sound Flow – пренослив Bluetooth звучник со Sound by Bose технологија. Има 20W вуфер, 10W твитер и двојни пасивни радијатори, со поддршка за Bluetooth 5.0, Wi-Fi 5 и UWB. Звучникот има IP67 заштита и батерија од 6.000 mAh, за која се тврди дека нуди до 12 часа репродукција.
Sound Flow има ткаенина со текстура на кепер, доаѓа во боите Pantone Carbon и Pantone Warm Taupe и вклучува капацитивни контроли чувствителни на допир.
Motorola на настанот ги претстави и Moto Pen Ultra пенкалото и Moto Tag 2.
Moto Pen Ultra има врв од 1,4 mm, Bluetooth 5.3 поврзување, 4.096 нивоа на чувствителност на притисок и 6-осен сензор за движење. Доаѓа со USB Type-C куќиште за полнење, има IP55 заштита, тежи само 4,7 g и се тврди дека има латенција под 5 ms.
Ажурираниот Moto Tag 2 доаѓа со UWB, Bluetooth звучен сигнал и Find Hub мрежа. Има IP68 заштита и нуди до 500 дена траење на батеријата, која корисникот може да ја замени.
Tag 2 вклучува и копче кое може да се користи за пронаоѓање на спарениот уред, а може да служи и како далечински окинувач за камера.
Компанијата ја најави и Qira – обединет AI асистент, заеднички развиен од Lenovo и Motorola, како и AI Perceptive Companion концептот наречен Project Maxwell.
Според Motorola, Qira е создадена за да понуди беспрекорно AI искуство на повеќе уреди, олеснувајќи им на корисниците префрлање меѓу апликации, AI алатки и хардвер. Таа ги обединува AI решенијата на Motorola и Lenovo, како moto AI, Lenovo AI Now, Creator Zone и Learning Zone во една платформа.
Qira е позиционирана како AI на системско ниво, свесна за контекст, и може да се активира со фразата „Hey, Qira“, со наменско хардверско копче или преку on-screen елемент. Motorola вели дека Qira ќе биде достапна за одбрани Lenovo уреди во првиот квартал од 2026 година, а подоцна и за уредите на Motorola.
Во меѓувреме, Project Maxwell, развиен од Motorolin 312 Labs, истражува нови начини за воведување на AI во секојдневната употреба. Тоа е нослив додаток со камера и микрофон, кој се интегрира со Qira и може континуирано да обработува визуелни, аудио и податоци од околината за да обезбеди увиди во реално време.
