Вградените активни вентилатори за ладење моментално се вистински хит во Кина, при што многу производители веќе излегоа со уреди што имаат вакво решение. А сега изгледа дека и Xiaomi работи на свој уред со вентилатор, според информациите од Digital Chat Station на Weibo.
Овој уред ќе биде придвижуван од MediaTek Dimensity 9500 SoC, и ќе има екран со „1.5K“ резолуција и „ултра-висока“ (иако не е дополнително прецизирано) стапка на освежување. Вентилаторот ќе биде дел од островот за камери, а целиот телефон ќе има IP68 сертификат за отпорност на прашина и вода, и покрај присуството на вентилаторот.
Овој телефон најверојатно е претстојниот Redmi K90 Ultra, ако се суди според чипсетот што го користи (претходните Ultra модели од K-серијата секогаш доаѓаа со најновите и најмоќните MediaTek чипови). Ако навистина станува збор за Redmi K90 Ultra, една претходна гласина тврдеше дека ќе има 6,8-инчен LTPS OLED дисплеј со стапка на освежување од 165 Hz, многу заоблени агли, метална рамка, ултразвучен читач за отпечатоци вграден во екранот, како и батерија со капацитет од најмалку 8.000 mAh.
