Интервју со Весна Иваноска, директорка на Авенга Академи, за трансформацијата на академијата изминатата година, новиот фокус на компании, LearnAI Lab и улогата на вештачката интелигенција во развојот на луѓе и организации
Разговараше: Никола Бурагев
Авенга Академи од 2025 година е поддржувач на Алијансата за родова еднаквост (GEA). Истата година, компанијата поминува и низ значајна трансформација – ребрендирање од Сеавус и Киншифт во Авенга Академи. За програмите што ги развива Академијата, визијата за нејзиниот понатамошен развој, како и пристапот кон родовата еднаквост на работното место, разговараме со Весна Иваноска, директорка на Авенга Академи.
Минатата година беше динамична за Авенга Академи, со нови програми, фокус на AI и јасно позиционирање кон практично знаење. Кои настани, проекти или одлуки би ги издвоиле како клучни моменти што ја одбележаа изминатата година за академијата?
2025 беше навистина динамична и, би рекла, трансформативна година за Авенга Академи, која на пазарот успешно постои повеќе од 15 години – најдолго под брендот Сеавус едукативен и развоен центар.
Покрај интерните промени, ова беше и година на значајни глобални технолошки скокови, но и сериозни предизвици. Сето тоа наметна потреба од похрабри, но внимателно промислени одлуки.
Клучен момент беше трансформацијата на нашето портфолио, како на индивидуалните програми, така и во насока на поизразен B2B-фокус. Ова „скршнување“ беше директно поврзано со навлегувањето на вештачката интелигенција и потребата компаниите многу побрзо да се адаптираат, не само технолошки, туку и организациски и културолошки.
Во таа смисла, ако морам да издвојам што навистина ја одбележа минатата година, тоа е нашата подготвеност да експериментираме, да тестираме нови формати – и лансирањето на LearnAI Lab како конкретен резултат на тој процес.
Лансирањето на LearnAI Lab привлече големо внимание во јавноста и бизнис-заедницата. Како се роди оваа идеја, кои конкретни потреби на компаниите и професионалците ги адресира и како се вклопува во долгорочната стратегија на академијата?
AI многу брзо стана тема за која сите зборуваат, но малкумина навистина знаат како да ја применат на начин што носи реална вредност. Токму таа празнина помеѓу ентузијазмот и практичната имплементација беше главниот мотив за создавање на LearnAI Lab.
Гледавме компании што сакаат да започнат со AI, но не знаат од каде, како и лидери и тимови под притисок „да бидат модерни“, без јасна слика за подготвеноста, оправданоста и влијанието врз луѓето и процесите.
LearnAI Lab го замисливме како компас – место каде што прво се дефинира контекстот, целите и реалните можности, а потоа се оди кон конкретна примена преку структуриран, но флексибилен и адаптивен пристап, кој ни овозможува континуирано да ги надградуваме програмите во чекор со развојот на технологијата. Во таа смисла, тој е природен дел од нашата долгорочна визија: да бидеме партнер во трансформација, а не само давател на обуки.
Вештачката интелигенција стана централна тема во образованието и бизнисот, но често и извор на конфузија. Како преку LearnAI Lab и останатите програми им помагате на компаниите и поединците не само да ја разберат AI, туку и ефективно да ја имплементираат во реални процеси?
LearnAI Lab го креиравме токму поради таа конфузија. Хајпот околу вештачката интелигенција беше толку силен што на многумина не им остави време ни простор да се подготват.
Кај голем дел од поединците, менаџерите, па дури и луѓето од технологијата, AI дојде „одеднаш“ што често резултираше со брзи и скапи потези, имплементација по секоја цена и без реална проценка на подготвеноста, оправданоста и човечкиот фактор.
Затоа, покрај LearnAI Lab, оваа година го лансиравме и AI Masterclass for Business Leaders – програма што произлезе директно од работата со компании и нивните реални дилеми. Таа е наменета за лидери и носители на одлуки и е фокусирана на стратешко разбирање на AI, проценка на бизнис-вредноста, управување со ризици и донесување информирани одлуки. Целта не е да се научат алатки, туку да се изгради јасна рамка за одговорна и одржлива примена на AI во конкретни организациски контексти.
Нашиот пристап е едноставен: прво компас, потоа пат.
Авенга Академи со години ја гради својата репутација преку резултатите на студентите, а не преку маркетиншки ветувања. Како изгледа овој пристап во пракса денес и како се менува начинот на работа со студентите во време на брзи технолошки промени?
Се трудиме, и покрај сите предизвици, да не отстапуваме од нашите приоритети – квалитетно образование со систематски и персонализиран пристап и, пред сè, реална применливост во бизнис-контекст.
Притисокот кој доаѓа од пазарот е огромен и донекаде очекуван. Делумно доаѓа од нереалните ветувања за брза едукација и „инстант успех“, но и од објективно зголемените можности што ги нуди EdTech индустријата – микро-компетенции, кратки курсеви, видеа, интерактивни платформи.
Сето тоа создава илузија дека сè може да се научи самостојно и без структура. Ние веќе експериментираме и инкорпорираме дел од овие нови формати, но тоа само дополнително ја зацврсти нашата позиција дека денес, поважно од кога било, е да понудиме насока, длабочина и контекст и да помогнеме знаењето навистина да се претвори во компетенција.
Пазарот на трудот постојано еволуира, а компаниите сè повеќе бараат практични, применливи вештини. Како Авенга Академи ја прилагодува својата едукативна понуда за да остане релевантна?
Со трансформирани програми што се поатрактивни и поинтерактивни, и кои постојано ги надградуваме според трендовите, но без да се изгуби балансот. Продолживме да инсистираме на основи, принципи, методологија, дисциплина и етичност – вредности што ги проверуваме и демонстрираме преку апликативни задачи и сценарија блиски до реалниот бизнис-контекст.
Во изминатата година се забележува поголем фокус кон работа со компании, тимови и лидери, а не само со индивидуални студенти. Што ви покажа ова искуство?
Корпоративните клиенти отсекогаш биле дел од нашето портфолио, но претходно овој сегмент беше помалку изразен поради фокусот на подолги квалификациски програми.
Со дигиталната трансформација и AI, компаниите некако природно станаа поголем предизвик за нас и за она што го правиме. Потребата беше очигледна, а нашата улога сè повеќе се поместува од класична едукација кон партнерство што подразбира заедничко учење, адаптација и трансформација.
Како поддржувач на Алијансата за родова еднаквост (GEA), како Авенга Академи ја интегрира родовата еднаквост во својата организациска култура и програми?
Авенга Академи и претходно, а особено сега како дел од глобална компанија со силни ESG политики, активно ги промовира своите заложби за еднаков пристап на жените и девојките пред се во STEM-едукацијата, ИТ индустријата, но и кон лидерските и менаџерските улоги. За нас, родовата еднаквост не е иницијатива, туку принцип што го применуваме во секојдневната работа.
Гледајќи напред, по една година исполнета со раст и иновации, кои се главните приоритети за следниот период?
Авенга Академи, а претходно Сеавус отсекогаш била синоним за сериозен и доверлив партнер, без разлика дали станува збор за индивидуално кариерно патување или корпоративна трансформација.
Ние не сме платформа на која ќе се “претплатите” туку посветен и компетентен тим што активно ве води низ процесот на промена. Во периодот што следи, очекувам уште појасно да се препознаваме по иновативниот, но одговорен пристап кон инкорпорирање на вештачката интелигенција и во едукацијата, и во растот на компаниите со кои соработуваме.
