Џејсон Банта од AMD објаснува зошто 2026 ќе биде клучна година за прифаќањето на AI компјутерите, како мини компјутерите играат важна улога во таа транзиција и зошто програмерите сега имаат огромен поттик.
Со оглед на тоа што популарноста на AI компјутерите постојано расте, од AMD порачаа дека очекуваат токму оваа година да биде онаа во која оваа технологија ќе стане мејнстрим.
Во разговор за TechRadar Pro на неодамнешниот саем CES 2026, Џејсон Банта, корпоративен потпретседател и генерален директор на Client OEM одделот во AMD, изјави дека 2026 ќе биде значајна година за прифаќањето на уредите со поддршка за вештачка интелигенција. „2026 е годината во која го очекуваме преминот кон AI компјутери“, изјави тој, „очекуваме да се продадат повеќе AI компјутери отколку оние без AI можности.“ Банта додаде дека сметаат оти оваа пресвртна точка е исклучително важна. „Тоа не значи само дека луѓето ќе кажат ‘очекувам да купам AI компјутер’, туку и дека за програмерите ќе стане логично да ги прифатат тие можности и да ги вградат во своите работни процеси и апликации, бидејќи постои огромна база на корисници на кои можат да им се обратат.“
Улогата и растот на популарноста на мини компјутерите
На прашањето дали мини компјутерите можат да им послужат на корисниците како пат кон AI уреди, Банта се согласи, напоменувајќи дека прифаќањето на мини компјутерите „расте побрзо отколку што многумина очекуваа“. Смета дека тие се важен чекор во транзицијата. „AI компјутерот е комбинација од хардвер и корисничко искуство кои се развиваат паралелно“, додаде тој. Објасни дека мини компјутерите моментално го доживуваат својот момент бидејќи луѓето ги препознаваат нивните предности. „Порано мислевте, во ред, голем десктоп компјутер ми дава многу перформанси, а со лаптоп морам да правам компромиси. Мини компјутерот беше некаде поблиску до лаптопот, но сега гледате одлични перформанси и кај лаптопите и кај десктоп компјутерите. Мини PC навистина решава многу потреби, нудејќи ја таа моќ директно на вашата работна маса.“
Банта истакнува дека AMD го започнал својот пат со AI компјутерите уште во 2023 година со мобилната серија 7000. Хардверот и невронската процесорска единица (NPU) беа присутни, но корисничкото искуство требаше да се подобри. Оттогаш, вели тој, AI искуствата и алатките, особено Microsoft Copilot, значително се унапредија. Како што прифаќањето расте и се вклучуваат и надворешни програмери, интересот и прифаќањето на технологијата нагло порасна. „Искуствата го поттикнуваат прифаќањето, но и прифаќањето ги поттикнува искуствата“, рече тој, додавајќи дека таа промена ја препознаваат и програмерите, кои секако сакаат да создаваат за најпопуларните платформи.
