YouTube воведува неколку дополнителни родителски контроли, вклучувајќи и можност за поставување временски ограничувања за гледање Shorts на тинејџерски профили.
Во блиска иднина, родителите и старателите ќе можат да го постават тајмерот за Shorts на нула на надгледуваните профили.
„Ова е прва функција во индустријата која на родителите им дава цврста контрола врз количината на кратка форма на содржина што ја гледаат нивните деца“, напиша во блог-објава Џенифер Фланери О’Конор, потпретседателка на YouTube за управување со производи. Покрај тоа, потсетниците за пауза и за време за спиење сега се вклучени стандардно за корисниците на возраст од 13 до 17 години.
Платформата, исто така, воведува нови принципи според кои на тинејџерите ќе им препорачува видеа што се посоодветни за нивната возраст и „збогатувачки“. На пример, YouTube почесто ќе им предлага видеа од платформи како што се Khan Academy, CrashCourse и TED-Ed. Се наведува дека овие принципи и водич за креаторите за изработка на видеа прилагодени за тинејџери ги развиле со помош на својот Советодавен одбор за млади, Центарот за научници и раскажувачи на UCLA, Американското психолошко здружение, Лабораторијата за дигитално здравје при Детската болница во Бостон и други организации.
Покрај тоа, ажурираниот процес на регистрација за детски профили ќе биде достапен во наредните недели. Детските профили се поврзани со родителските и немаат сопствена е-пошта или лозинка. YouTube вели дека корисниците ќе можат да се префрлаат меѓу профилите во мобилната апликација со само неколку допири.
„Ова ја олеснува можноста секој во семејството да има соодветно искуство за гледање, со поставки за содржина и препораки соодветни на возраста, кои навистина сакаат да ги гледаат“, напиша О’Конор.
