По почетната достапност во САД и Јужна Кореја, сега сите можат да го преземат Samsung Internet за Windows
Samsung уште во октомври го претстави Samsung Internet за Windows, интернет-прелистувач кој компанијата веќе со години го користи на своите Galaxy уреди. Тогаш прелистувачот можеа да го преземат само корисниците во Јужна Кореја и САД, а сега тоа можат да го направат сите корисници.
Според функционалноста, Samsung Internet не се разликува многу од останатите прелистувачи на кои многумина веќе се навикнати. На корисниците им е овозможено стандардно прелистување на интернет, со дополнителни функции како што е синхронизација на податоци помеѓу Windows и уреди со Android.
Една од клучните предности е интеграцијата со Samsung Pass, која овозможува безбедно зачувување и синхронизација на лозинки, како и продолжување на прелистувањето на веб-страници на други уреди.
Сепак, треба да се напомене дека Samsung Internet сè уште е во бета фаза и сè уште не е познато кога ќе излезе стабилната верзија. Може да се преземе преку оваа врска, иако сè уште стои напомена дека е достапен само во САД и Јужна Кореја.
