Од биопечатени органи и роботи-цимери до крајот на паметниот телефон, експертите најавуваат технологии што би можеле да ја одбележат средината на векот.
Според футурологот Том Чизрајт и астрофизичарот д-р Аластер Рејнолдс, низа технолошки пробиви кои денес изгледаат како научна фантастика би можеле да станат секојдневие до 2050 година. Нивната анализа укажува дека темпото на иновации во здравството, енергетиката, исхраната и дигиталните уреди значително ќе го унапреди квалитетот на живот, и покрај честите стравови од прекумерна автоматизација и вештачка интелигенција.
Здравствениот систем, според предвидувањата, би се поместил од лекување кон превенција, со поширока примена на биопечатени органи кои би ги заменувале оштетените или нефункционални делови од телото. Ваквата технологија ветува подолг и поздрав живот, со значително подобри терапевтски можности отколку денес.
Како би можел да изгледа животот во средината на векот?
Во областа на вселенските технологии, се очекува почеток на изградбата на првиот вселенски лифт: огромна структура наменета за транспорт на товар и патници во орбита. За разлика од ракетите, овој вид патување би бил потивок, почист и поодржлив, со повеќенеделно патување и единствен поглед на Земјата.
Во нашите куќи и станови, роботите би станале вообичаени „цимери“, способни да извршуваат домашни работи како чистење, перење и изнесување отпад, но и да пружат друштво благодарение на напредната вештачка интелигенција. Истовремено, исхраната би се менувала: лабораториски одгледувано месо и инсекти во преработена форма би нуделе нови, одржливи извори на протеини.
Една од најрадикалните промени се однесува на дигиталните уреди. Паметните телефони, какви што ги познаваме денес, би можеле да исчезнат, а нивното место би го зазеле паметни очила и речиси невидливи екрани интегрирани во животниот простор. Авторите на проектот „Meet Tomorrow“ истакнуваат дека целта на овие прогнози е да поттикнат оптимизам и да покажат дека технолошкиот напредок, како и порано, може да го надмине песимизмот и да го унапреди секојдневниот живот.
