Кинескиот вселенски телескоп Xuntian со огледало од 2 метри и камера од 2,5 милијарди пиксели се приближува кон лансирање во 2027 година и ветува револуција во мапирањето на вселената
Кина забрзано се приближува кон лансирањето на голем вселенски телескоп кој ќе орбитира заедно со нејзината станица Тиангонг, а научниците во меѓувреме успешно ја завршија целосната симулација на набљудувања за да ги проверат неговите реални способности.
Телескопот со големина на автобус, официјално наречен Chinese Space Station Telescope, а познат и како Xuntian, што значи „набљудување на небото“, е планиран за лансирање веќе на почетокот на 2027 година. Опремен е со примарно огледало со пречник од 2 метри, што го прави нешто помал од вселенскиот телескоп Хабл, но тоа не значи и послаб во вкупните можности.
Пошироко видно поле од Хабл и камера од 2,5 милијарди пиксели
Според наводите на кинеските вселенски официјални лица, Xuntian ќе биде далеку помоќна алатка за систематско снимање на небото. Телескопот користи камера со дури 2,5 милијарди пиксели и има видно поле околу 300 пати поголемо од она на Хабл. Набљудувањата ќе опфаќаат спектар од ултравиолетово до блиско инфрацрвено зрачење, со висока просторна резолуција.
Како што подготовките за лансирањето се приближуваат кон завршната фаза, кинескиот истражувачки тим разви комплетен систем за симулација „од почеток до крај“, кој овозможи изработка на симулирани набљудувања за оптичките и другите инструменти на телескопот. Целта беше што поверно да се репродуцираат очекуваните инструментални и услови за набљудување, како и да се процени вкупната ефикасност на системот. Резултатите од ова истражување беа објавени на почетокот на јануари во научното списание Research in Astronomy and Astrophysics.
Според проценките на истражувачите од National Astronomical Observatories, кои ја предводеа студијата, Xuntian ќе даде значаен придонес во области како што се космологијата, проучувањето на галаксиите, еволуцијата на Млечниот Пат, како и настанокот и развојот на ѕвездите и планетите. Телескопот исто така би можел да донесе нови сознанија за темната материја и темната енергија.
По лансирањето со ракетата Long March 5B, Xuntian ќе орбитира самостојно во ниската Земјина орбита, но синхронизирано со кинеската вселенска станица Тиангонг. Како што е прикажано во снимките на кинеската државна телевизија CCTV, телескопот ќе може да се спои со станицата, што ќе им овозможи на астронаутите излегување во отворена вселена заради одржување, поправки или дури и надградба на инструментите, по примерот на сервисните мисии што НАСА ги спроведуваше на Хабл помеѓу 1993 и 2009 година.
Ако сè оди според планот, Xuntian веќе до крајот на оваа деценија би можел да стане една од најважните вселенски опсерватории во светот, пренесува Space.
