Претстојната Galaxy S26 серија на Samsung го носи првиот 2 nm Exynos чип, унапредениот Snapdragon 8 Elite Gen5 и сателитската комуникација како нови адути
Серијата Samsung Galaxy S26 успешно ја помина FCC сертификацијата во САД, која ги опфаќа моделите Galaxy S26, Galaxy S26+ и Galaxy S26 Ultra. Верзиите наменети за американскиот пазар го користат процесорот Snapdragon 8 Elite Gen5 и поддржуваат сателитска комуникација, што го потврдува фокусот на Samsung кон напредни хардверски и комуникациски можности.
Особено е интересно што Galaxy S26 и Galaxy S26+ ќе бидат достапни во две хардверски варијанти. Додека поголемиот дел од пазарите ќе го користат Snapdragon 8 Elite Gen5, моделите наменети за Јужна Кореја ќе бидат опремени со процесорот Samsung Exynos 2600 – првиот комерцијален мобилен процесор во светот произведен во 2 nm производствен процес.
Двојна процесорска стратегија и зајакнување на флегшип понудата
Exynos 2600 носи десетјадрен дизајн со едно јадро со максимален такт од 3,80 GHz, три брзи јадра на 3,26 GHz и шест енергетски ефикасни јадра на 2,76 GHz. Според достапните податоци, чипот постигнува повеќе од 3.400 поени во single-core и над 11.000 поени во multi-core тестови, со што се позиционира во самиот врв на Android понудата.
Galaxy S26 Ultra останува единствениот модел кој глобално користи исклучиво Qualcomm решение, и тоа во форма на специјална верзија Snapdragon 8 Elite Gen5 for Galaxy. Овој процесор работи на максимална фреквенција од 4,74 GHz, што е повеќе во однос на стандардната верзија, а дополнително го користи унапредениот TSMC N3P производствен процес од трета генерација, кој носи постабилни перформанси и подобра енергетска ефикасност.
За нашиот пазар и пазарите во регионот се очекува сите три модели да ја користат Snapdragon платформата, додека корисниците кои го посакуваат Exynos 2600 ќе мора да се потпрат на корејскиот пазар. Според досегашната практика, официјалната премиера на серијата Galaxy S26 е планирана за март.
Со оваа серија, Samsung комбинира сопствен технолошки развој и најмоќните Qualcomm решенија, јасно порачувајќи дека Galaxy S26 претставува еден од клучните Android флегшип модели за 2026 година.
