Snapdragon X2 Elite покажува одлични резултати во споредба со M5 чипот на Apple, со минимално поголема потрошувачка на енергија и видлив напредок во CPU и GPU тестовите
Влегувањето на Qualcomm во сегментот на Windows лаптопи со првата генерација на Snapdragon X Elite чипови беше само почеток. Најновите резултати од тестирањата покажуваат дека Snapdragon X2 Elite направи голем исчекор, до таа мера што во некои тестови е подобар и од M5 процесорот на Apple, додека истовремено убедливо го надминува својот директен претходник.
Тестовите беа извршени со одобрување на ASUS, на предпродукциски Zenbook модел. Важно е да се нагласи дека беа користени рани драјвери и фирмвер, па резултатите не мораат целосно да ги отсликуваат конечните перформанси на комерцијалните уреди кои ќе се појават подоцна во текот на годината.
Перформанси со минимално поголема потрошувачка
Сите бенчмарк тестови беа извршени при потрошувачка од 31 W, што е само 5 W повеќе во споредба со M5, кој достигнува максимални 26 W. И покрај таа мала разлика, Snapdragon X2 Elite успева да го победи M5 во три од пет тестови, со што потврдува дека новата архитектура на Qualcomm носи значителен напредок во однос на перформансите и потрошувачката. Во исто време, разликата во однос на оригиналниот Snapdragon X Elite е изразена, како во CPU, така и во GPU задачите.
Тестовите за автономија на батеријата не беа спроведени, токму поради тест природата на примерокот и нестабилноста на софтверот. Дополнителен фактор на неизвесност претставува и Windows 11, кој со чести ажурирања може да влијае на траењето на батеријата, позитивно или негативно, во зависност од верзијата на системот и драјверите.
Hardware Canucks ги објави и резултатите за Intel Core Ultra X9 388H, кои укажуваат дека Intel сериозно возвраќа удар во мобилниот сегмент. Подеталните споредби со x86 конкуренцијата веќе покажуваат дека пазарот на Windows лаптопи повторно се загрева.
Иако сè уште е рано за конечни заклучоци, првите податоци јасно сугерираат дека Snapdragon X2 Elite претставува голем чекор напред за Qualcomm и дека може сериозно да го промени односот на силите во врвниот сегмент на преносни компјутери базирани на Windows платформа, пренесува YouTube каналот Hardware Canucks.
