Долгонајавуваниот OLED MacBook Pro со екран на допир, кој Apple го развива веќе подолго време, ќе го усвои Dynamic Island од iPhone и ќе пристигне со селфи камера со „hole-punch“ отвор, пренесува Bloomberg.
Dynamic Island ќе го замени „notch“-от, оставајќи повеќе достапен простор на екранот за содржина. Како и кај iPhone, Dynamic Island на Mac ќе биде интерактивен и контекстуално ќе се проширува во зависност од апликацијата или функцијата што се користи.
Apple го надградува macOS за да биде попријателски настроен кон користење со допир. Корисниците ќе можат да допираат или кликаат елементи на екранот, а контролите ќе се менуваат според начинот на внес. На пример, ако корисник допре ставка во менито, ќе се прикаже поголем сет контроли оптимизиран за допир. Опциите базирани на допир ќе бидат интегрирани низ целиот систем, со поддршка за функции познати од iPad, како „pinch“ гестови за зумирање и одзумирање и брзо скролање.
Новиот MacBook Pro ќе биде првиот Mac што поддржува гестови на допир директно на екранот, и покрај долгогодишните тврдења на Apple дека нема да воведе технологија базирана на допир кај Mac компјутерите. Компанијата претходно експериментираше со OLED Touch Bar кај некои модели на MacBook Pro, но на крајот ја отстрани поради слаб интерес кај корисниците. Сепак, Apple нема да го рекламира MacBook Pro како уред првенствено наменет за допир, како што е iPad, туку ќе им овозможи на корисниците да користат и допир и гестови со глувче наизменично за сите функции.
Покрај екранот на допир и OLED технологијата, MacBook Pro би можел да добие освежен дизајн со потенко куќиште, но генерално ќе наликува на актуелниот модел. Apple нема да ги отстрани тастатурата и trackpad-от, а не се очекуваат промени во димензиите. Планирани се OLED верзии и за 14-инчниот и за 16-инчниот MacBook Pro.
Apple оваа пролет планира надградба на MacBook Pro со M5 Pro и M5 Max чипови, но OLED моделите ќе ги користат M6 Pro и M6 Max чиповите, изработени со новиот 2-нанометарски процес на компанијата. Се очекува OLED MacBook Pro моделите да бидат лансирани кон крајот на 2026 година, што значи дека Apple планира две освежувања на MacBook Pro линијата во текот на 2026.
