Компанијата Google го лансираше Nano Banana 2, понапредна верзија на својот исклучително популарен AI генератор на слики.
Google го претстави првиот Nano Banana во август, а услугата брзо стана вирална. Nano Banana Pro се појави на пазарот во ноември, изграден врз моделот Gemini 3 Pro.
Во својата објава на блог, Google наведе дека Nano Banana 2 поседува напредно „знаење за светот“, користејќи информации во реално време од Gemini за попрецизно рендерирање. Од компанијата истакнаа и поголема брзина на новиот модел, подобрено следење на инструкциите и попрецизно прикажување на текст – за потреби како „маркетинг макети или честитки“.
Компанијата соопшти дека Nano Banana Pro ќе остане достапен за „задачи со висока прецизност, кои бараат максимална фактичка точност“, додека Nano Banana 2 ќе биде фокусиран на „брзо генерирање, прецизно следење на инструкциите и интегрирано поврзување со пребарување на слики“.
Nano Banana 2 го заменува својот претходник во Fast, Thinking и Pro моделите на Gemini.
Генераторите на слики и видеа базирани на вештачка интелигенција стануваат сè попопуларни меѓу корисниците, кои можат да креираат сè понапредни и подетални графики и видеозаписи со само неколку текстуални упатства. OpenAI во 2024 година го лансираше својот алат за генерирање видео, Sora, а извршниот директор Sam Altmanминатиот март напиша дека високата употреба „ги топи“ неговите AI процесори.
Adobe се залага за понатамошна интеграција на вештачката интелигенција во својот пакет креативни алатки со генераторот на слики и видеа наречен Firefly.
Креативните компании изразија загриженост поради можни прекршувања на авторските права со ширењето на генеративните AI алатки. ByteDance се соочи со негативни реакции од големи холивудски студија, вклучувајќи ги Disney и Paramount, поради наводно нарушување на интелектуалната сопственост поврзано со неговиот AI алат за видео наречен Seedance.
