-
Светска премиера: Интелигентни повици – без апликации – на кој било уред
-
Очила со ВИ: Визија за „hands-free“ користење со помош на ВИ
-
Дигитални идентитети: Паметниот телефон станува универзален клуч
-
Суверени „облаци“: Моќни решенија за Европа
-
Мулти-агенти со ВИ: Автономен систем за рано предупредување во мобилните мрежи
-
6G и квантум: Мобилни комуникации на утрешнината и интернет на иднината
Фокусот на Дојче Телеком на овогодинешниот Светскиот конгрес за мобилна технологија 2026 (Mobile World Congress 2026 – MWC) е ставен врз услугите базирани на вештачка интелигенција (ВИ) и новите технологии за неговите корисници. Од асистент за повици со ВИ што е интегриран во мрежата и агенти со ВИ за управување со мобилните мрежи, па сè до најновите достигнувања во 6G и квантниот интернет – Групацијата ги претставува своите најнови иновации и визионерски концепти пред меѓународната технолошка заедница во Барселона, под мотото: „Magenta AI насекаде. Во служба на човекот.“
„Ние сме оптимисти во однос на вештачката интелигенција и ја користиме одговорно. Ја интегрираме директно во нашите мрежи, производи и услуги – скалабилно, безбедно и со јасна додадена вредност за луѓето и за економијата“, изјави Абду Мудесир, член на одборот за производи и технологија во Дојче Телеком. „Вештачката интелигенција станува клучната технологија на нашето време. Таа ќе ја одреди конкурентноста, технолошките перформанси и дигиталниот суверенитет на Европа.“
Редефинирање на повиците: Паметен асистент за повици што се активира со гласовна команда
На MWC 2026, Дојче Телеком ќе направи светска премиера на Magenta AI Call Assistant, воедно откривајќи ја својата визија за иднината на повиците поддржани од вештачката интелигенција. Вештачката интелигенција станува дел од самиот телефонски повик – таа ќе биде достапна веднаш во реално време, без потреба од апликации или скапа дополнителна опрема.
„Со нашиот Magenta AI Call Assistant, ние сме први во светот што нудиме вакви ВИ-функции интегрирани во мрежата. Ги отстрануваме бариерите – без апликации, без специјални уреди, без техничка сложеност. Вештачката интелигенција станува едноставна, интуитивна и достапна за секого.“ – вели Абду Мудесир.
Првите услуги ќе вклучуваат превод во живо, резимеа на повици и одговори на прашања од секаков вид. Во иднина, асистентот за повици ќе овозможи интеграција на многу други нови функции во телефонскиот разговор. Разговорите се претвораат во акции: вештачката интелигенција може да изврши резервација (ресторан, лекарски преглед, патување), да пополни формулари, да поставува прашања и уредно да ја документира потврдата.
Асистентот се активира со „Hey Magenta“. Без активација, разговорите не се снимаат и не се анализираат. Потребна е согласност (opt-in), а сите учесници се известени кога ВИ е активна. Решението е развиено во соработка со ElevenLabs и прво ќе биде достапно во Германија, со поддршка до 50 јазици во следните 12 месеци.
ВИ-очила: Слободни раце, без апликации и без паметен телефон
Преку своите ВИ-очила, Телеком претставува една концептуална студија која истражува како вештачката интелигенција би можела да еволуира надвор од паметниот телефон во секојдневна „hands-free“ асистенција. Базирани на моделот RayNeo X3 Pro, компанијата покажува како дигиталната интелигенција, гласовната интеракција и препознавањето на реалниот свет функционираат во синхронизација.
Очилата стануваат паметен придружник: доволен е само еден поглед или гласовна команда за да се препознаат производи, да се преведе текст во реално време, да се прикажат релевантни информации директно во видното поле на корисникот или автономно да се извршат задачи.
За што од наведеното и да станува збор, Телеком ја оцртува визијата за користење на вештачката интелигенција без апликации и на повеќе уреди. Во оваа визија, технологијата станува суптилен сопатник, каде гласот служи како централен, интуитивен интерфејс.
Паметните телефони стануваат универзален клуч
Дојче Телеком претставува нова платформа за мобилна безбедност на MWC. Magenta Security Mobile.ID ги претвора паметните телефони во „универзален клуч“ за дигитални идентитети преку Bluetooth и NFC, овозможувајќи му на уредот да ги замени физичките клучеви, паметните картички или дури и документите за идентификација, задржувајќи го притоа целосниот суверенитет на податоците. Првично достапно на уредите на Samsung, Телеком планира да го воведе ова решение за деловните корисници во Европа подоцна во 2026 година.
Заштита од лажни агенти во ВИ-системите
Потврдените дигитални идентитети се клучни не само за луѓето, туку и за употребата на вештачката интелигенција во компаниите. Автономните системи можат да станат цел на измами или deepfake напади – на пример, кога еден ВИ-агент се претставува како постоечки систем за да извлече чувствителни податоци или да ги попречи деловните процеси.
На MWC, Дојче Телеком претставува безбедносен концепт дизајниран да ги заштити автоматизираните и чувствителни деловни работни процеси, правејќи ги реалистични актуелните сценарија за напади преку наменски deepfake експонат.
Дигитален суверенитет: Решенија базирани на технологија во „облак“ за европските компании
Со неодамнешното претставување на Industrial AI Cloud во Минхен, заедно со NVIDIA, Дојче Телеком воведе една од најмоќните инфраструктури за вештачка интелигенција во Европа – испорачувајќи огромна моќ за компјутерска обработка и целосен суверенитет на податоците за европските претпријатија.
На MWC, компанијата им дава значајна платформа на оваа и на другите понуди на услуги базирани на технологија во „облак“, вклучувајќи го и новиот „Business Cloud“ за европските пазари. Решението е наменето за мали и средни претпријатија, како и за големи корисници од јавниот и приватниот сектор, обезбедувајќи суверена локална инфраструктура на дата центри со високи перформанси, поддржана од технологија во „облак“ и ВИ, дизајнирана да ги поттикне деловните иновации.
Исто така, изложен е и European Edge Continuum – првата прекугранична меѓусебно поврзана „edge cloud“ инфраструктура којашто овозможува непречено функционирање на апликациите преку националните граници.
ВИ-агент во рутерот: Интелигенција за домот
Преку концептот на Интелигентен дом, Дојче Телеком ја претставува својата визија за поврзаното домаќинство: ВИ-агентот се интегрира директно во рутерот, претворајќи го во интелигентен и проактивен систем за решавање проблеми којшто ги поврзува уредите, услугите и луѓето. Системот ги учи навиките, одговара на индивидуалните потреби и управува со уредите во домот без разлика на технологијата или производителот.
Благодарение на технологијата Edge AI, приватноста е загарантирана: сите податоци се обработуваат исклучиво локално во рутерот и не го напуштаат домот.
MINDR: ВИ-агенти ја оптимизираат мобилната мрежа во реално време
МINDR е мулти-агентен ВИ-систем развиен од Дојче Телеком во соработка со Google Cloud, кој континуирано ја надгледува мрежата, предвидува можни случувања и реагира автономно кога е потребно. Системот детектира аномалии, зголемени оптоварувања или ризици по перформансите во рана фаза, пред тие да влијаат врз корисниците.
Изграден со моделите Google Gemini, специјализирани ВИ-агенти ги поврзуваат сигналите од различни мрежни домени, ги анализираат причините и автономно активираат корективни мерки.
Ова претставува уште еден чекор напред кон автономна мрежа којашто може самата да се регенерира. Првичните распоредувања се планирани за подоцна во текот на оваа година.
Мрежи со интегрирана ВИ коишто ја разбираат намерата на корисникот
Под насловот „Reimagine the Network“ (Редефинирање на мрежата), Телеком ја оцртува визијата за мрежа којашто ја толкува намерата на корисникот и динамично ги распределува мрежните ресурси врз основа на барањата. Ефикасноста станува основен принцип на дизајнот: мрежните ресурси се активираат само кога се навистина потребни, следејќи го принципот „Нула бити – нула вати“.
Овој пристап е овозможен со поедноставена мрежна архитектура којашто поддржува предвидување, автоматизација и попрецизно искористување на ресурсите. Со 6G, следната генерација на мобилни комуникации, делови од оваа визија би можеле да започнат да стануваат реалност.
Иновациски центар за 6G: Поставување на темелите за Физичка ВИ
Заедно со T-Mobile US, Дојче Телеком ги интензивира напорите за остварување на својата визија за 6G. Како дел од новиот трансатлантски Иновациски центар за 6G, компаниите ќе ги обединат клучните партнери во заедничко истражување, развој на прототипови и теренски тестирања, со амбиција да обликуваат унифициран глобален стандард за 6G.
Со седиште во иновациската лабораторија на T-Mobile во Белвју и во T-Labs во Берлин, 6G ќе биде дизајнирана и развиена како систем со целосно интегрирана ВИ. Заедничкиот центар ќе се фокусира на три столба: автономни мрежи за интелигентно поврзување, безбедно детектирање и позиционирање, како и конвергенција на поврзувањето и компјутерската обработка со високи перформанси.
Во центарот на овие напори е 6G како основа за Физичка ВИ, односно системи коишто не само што ги толкуваат информациите, туку и комуницираат и го контролираат физичкиот свет во реално време.
Телепортација: Клучна пресвртница на патот кон квантниот интернет
Во Барселона, единицата за истражување и развој на Дојче Телеком T-Labs и Qunnect за првпат ја претставуваат својата успешна квантна телепортација преку комерцијална оптичка мрежа.
Во реално телекомуникациско опкружување, партнерите пренесоа квантни информации преку веќе поставена оптичка мрежа од 30 километри со просечна прецизност од 90 проценти, паралелно со редовниот сообраќај на податоци.
Овој успешен теренски тест претставува одлучувачки чекор кон остварлив квантен интернет и докажува дека квантните технологии можат да функционираат на постојните оптички мрежи.
Од 2 до 5 март 2026 година, во Барселона, на простор од околу 1.000 квадратни метри, изложбениот простор на Дојче Телеком се фокусира на врската помеѓу луѓето и технологијата. Импресивното шестметарско 3Д-лого на Дојче Телеком ги внесува посетителите во свет на интерактивно искуство. Една од главните атракции е МИА, ВИ-аватар во природна големина, којшто одговара на прашања со притискање копче на 86-инчен екран. Како „менаџер за добредојде“, МИА обезбедува информации на пет јазици во врска со експонатите и програмата на сцената, како и дополнителни детали за присуството на саемот.
