Новиот Apple MacBook Neo носи помодуларен дизајн кој ја олеснува поправката на клучни компоненти како батеријата и тастатурата, што го прави попривлечен за бизнис корисници и училишта.
Една помалку истакната промена што би можела новиот Apple MacBook Neo да го направи попривлечен за компании, училишта и за корисници склони кон несреќни случаи е неговиот внатрешен дизајн, кој е помодуларен и полесен за поправка од другите современи MacBook модели.
Како што дознава Ars Technica, замената на речиси секоја компонента во Neo е поедноставна и бара помалку чекори и алати отколку кај MacBook Air M5. Тоа ја вклучува и батеријата, која кај MacBook Air е прицврстена за куќиштето со повеќе завртки и лепливи ленти, додека кај Neo се вади релативно лесно откако ќе се отстранат неколку заштитни плочи и флексибилни кабли.
Сепак, најзначајната промена кај Neo е тоа што тастатурата станува посебна компонента. Кај речиси сите современи MacBook модели, уште од алуминиумските unibody модели од крајот на 2000-тите, тастатурата беше интегрирана во горниот дел од куќиштето на лаптопот и беше исклучително тешко – ако не и невозможно – да се замени одделно.
Apple сè уште не ги има наведено компонентите за MacBook Neo во својата продавница за делови, но според цените за поправка што ги објавиле, деловите за Neo би требало да чинат значително помалку од оние за поскапите MacBook модели.
Да потсетиме, сличен пристап Apple применува и кај основниот модел на Apple iPad. Кај тој таблет, стаклото на екранот и панелот не се целосно ламинирани како кај поскапите модели, што значи дека во случај на пукање може да се замени само стаклото без потреба од замена на целиот склоп на екранот.
