Нов iPhone spyware „Darksword“ цели стари iOS верзии и може да загрози стотици милиони уреди ширум светот
Истражувачи открија нов софистициран spyware наречен „Darksword“, кој може да зарази iPhone уреди и да украде чувствителни податоци, вклучувајќи информации од крипто паричници. Овој злонамерен софтвер неодамна бил дистрибуиран преку десетици веб-страници во Украина, а потенцијално може да погоди стотици милиони уреди што користат застарени верзии на iOS.
Според анализите на компаниите Lookout, iVerify и Google, Darksword претставува дел од поширок бран напредни напади на Apple уреди. Само неколку недели претходно беше откриен уште еден spyware наречен „Coruna“, а двата алатки укажуваат на растечки пазар на комерцијален надзорен софтвер кој повеќе не е ограничен само на државни актери.
Darksword напаѓа стари iOS верзии
Истражувачите наведуваат дека spyware-от се ширел преку заразени веб-страници и таргетирал iPhone уреди со iOS верзии од 18.4 до 18.6.2, кои беа објавени во текот на 2025 година. Проценките покажуваат дека помеѓу 220 и 270 милиони iPhone уреди сè уште ги користат овие верзии на системот, што ги прави потенцијално ранливи.
Google идентификувал повеќе кампањи во различни држави, вклучувајќи ги Саудиска Арабија, Турција, Малезија и Украина. Некои од операциите се поврзани со турската компанија PARS Defense, додека инфраструктурата делумно се поклопува со сервери што претходно биле користени за spyware Coruna.
Apple потврди дека ранливостите што ги користи Darksword веќе се закрпени преку понови верзии на iOS и нагласи дека нападите се насочени кон уреди со застарен софтвер. Исто така беше потврдено дека Safari автоматски ги блокира познатите злонамерни домени преку Safe Browsing заштита.
Сепак, експертите предупредуваат дека загрижува тоа што вакви алатки сè почесто се користат во масовни напади, а не само во таргетирани операции. Според нив, тоа укажува дека софистицираните алатки за надзор стануваат достапни за поширок круг актери, вклучително и криминални групи, пренесува Reuters.
