Федералната комисија за комуникации (FCC) објави известување со кое сите потрошувачки рутери произведени надвор од САД се означуваат како безбедносен ризик.
Правилото наведува дека новите модели на мрежни рутери произведени во странство ќе бидат ставени на листата наречена Covered List, која всушност опфаќа комуникациска опрема за која се смета дека претставува неприфатлив ризик за националната безбедност. Претходно купените рутери и понатаму може да се користат, а трговците сè уште можат да продаваат модели одобрени според претходните политики на FCC. Како исклучок, рутерите што се наоѓаат на оваа листа ќе можат да продолжат да добиваат ажурирања најмалку до 1 март 2027 година, иако овој рок може да биде продолжен.
Овој потег произлегува од целите во стратегијата за национална безбедност на Белата куќа за 2025 година.
„Соединетите Американски Држави никогаш не смеат да бидат зависни од било која надворешна сила за клучни компоненти – од суровини до делови и готови производи – кои се неопходни за одбраната или економијата на нацијата“, се наведува.
Во известувањето на FCC се додава дека компаниите можат да поднесат барање за условно одобрување за нови производи до Министерството за одбрана или Министерството за внатрешна безбедност, но тоа бара од нив да достават план за преместување на барем дел од производството во САД за да го добијат тоа одобрување.
Мал број брендови познати по рутери за широка потрошувачка моментално произведуваат во САД. Се чини веројатно дека оваа сеопфатна одредба ќе се соочи со правни предизвици и ќе предизвика конфузија кај многу компании кои имаат производствени капацитети во странство. Покрај кинеските технолошки гиганти како TP-Link, ќе бидат погодени и американски компании. NetGear, Eero и Google Nest имаат седиште во САД, но производството го вршат во Азија. Барем дел од тоа производство се одвива во региони како Тајван, кои историски имаат добри односи со САД.
Додека секторот не се прилагоди на ова ново ограничување, Американците не треба да очекуваат нови модели на рутери на полиците во продавниците.
