Социјалната мрежа Instagram тестира нова претплатничка услуга, која ќе им овозможи на корисниците што плаќаат неколку нови функции, вклучително и можност за преглед на Story на друг корисник во скриен режим.
Другите погодности вклучуваат креирање листи на публика покрај листата „Close Friends“ и продолжување на траењето на Stories за дополнителни 24 часа, за што претходно пишувавме. Instagram Stories се фотографии и видеа кои исчезнуваат по 24 часа. Во моментов, креаторот може да види кој ги гледа.
„Нашата надеж е дека преку овие тестови ќе разбереме што е највредно за луѓето во премиум пакетот на функции“, изјави портпарол на Instagram за Bloomberg.
TechCrunch прв извести за тестирањето и наведе дека Instagram нуди претплати во Мексико, Јапонија и Филипините за околу 1 до 2 долари месечно.
Во последните неколку години, Meta експериментира со различни платени производи за да оствари приходи надвор од својата главна рекламна дејност.
Во 2023 година беше лансиран Meta Verified, претплатничка услуга за креатори и бизнис налози која помага во заштита на брендовите од лажно претставување и градење кредибилитет. Verified има четири нивоа, од кои најскапиот чини 500 долари месечно.
Други претплатнички производи вклучуваат претплата без реклами за корисници од Европската Унија и месечна претплата која им овозможува на фановите да добијат ексклузивна содржина од нивните омилени креатори.
Snapchat, X, YouTube и LinkedIn воведоа премиум нивоа кои отклучуваат одредени функции за платени корисници, во обид да ги дополнат приходите од рекламирање и да ги направат приходите попредвидливи.
