Исклучително популарниот MacBook Neo компјутер поттикна промени во Windows 11, поради што Microsoft подготвува унапредувања.
Претставувањето на новиот Apple лаптоп MacBook Neo, кој привлече огромно внимание кај корисниците, а чија цена започнува од 599 долари во САД (кај нас 40.000 денари), би можела да влијае и врз следните потези на компанијата Microsoft кога станува збор за развојот на оперативниот систем Windows 11.
Според информации од индустријата и досегашната пракса, Microsoft често одговара на конкурентските притисоци со унапредување на своите производи. Слични обрасци биле забележани и претходно. По успехот на MacBook Air беше покрената иницијатива за развој на тенки и лесни лаптопи во рамки на проектот Ultrabook. Популарноста на iPad уредите влијаеше врз развојот на сопствен Microsoft хардвер во таа категорија.
Исто така, растот на Chromebook доведе до обид преку Windows во S режим да се понуди поедноставно и побезбедно корисничко искуство.
Што направи MacBook Neo за Windows 11
Набрзо откако Apple го претстави MacBook Neo, Microsoft објави план за унапредувања на Windows 11. Фокусот е ставен на перформансите, сигурноста и целокупното корисничко искуство. Тајмингот на овие најави укажува дека компанијата внимателно ја следи конкуренцијата и ја прилагодува својата стратегија според движењата на пазарот.
Извори запознаени со развојот на Windows наведуваат дека одредени промени биле планирани уште во текот на минатата година. Тоа конечно вклучува и подобрувања во конзистентниот приказ на темниот режим низ целиот систем. Сепак, со појавата на подостапен MacBook модел и сè погласните критики од корисниците кон Windows 11, фокусот е проширен кон посеопфатни подобрувања.
Една од клучните промени што се очекува подоцна оваа година се однесува на поефикасно управување со меморијата, што треба да придонесе за подобри перформанси и поголема стабилност на системот.
Иако Microsoft директно не ги поврза овие потези со Apple уредот, историски гледано, конкурентскиот притисок често бил поттик за забрзани промени во Windows екосистемот.
