SpaceX работи на развој на RF чипови за Starlink Mobile, со план да овозможи 5G врска директно од сателити до мобилни телефони.
SpaceX Starlink Mobile влегува во нов технолошки правец, бидејќи според најновите информации компанијата планира развој на сопствени RF чипови за директна комуникација помеѓу сателити и мобилни уреди.
Нова објава за работа открива дека SpaceX бара инженер за развој на RF front-end модули, клучна компонента во мобилните уреди која управува со приемот и испраќањето на безжични сигнали. Овие модули вклучуваат антени, засилувачи и филтри за обработка на сигналот, а нивната оптимизација е пресудна за квалитетот на врската.
SpaceX Starlink Mobile добива сопствен RF чип
Посебен фокус е ставен на развој на т.н. multi-chip модули, кои би ги обединиле RF компонентите за 5G, LTE и Wi-Fi комуникација. Целта е нивна интеграција во Starlink Mobile мрежата, со што би се подобриле перформансите и стабилноста на врската.
Овој потег е поврзан со пошироките планови на компанијата да ја унапреди услугата Starlink Mobile преку користење на радио спектарот што го презема од EchoStar. Новата генерација сателити, планирана за лансирање во средината на 2027 година, треба да овозможи брзини до 150 Mbps, што е значителен напредок во однос на сегашните околу 4 Mbps.
Според претходни изјави на Илон Маск, ќе бидат потребни околу две години за производителите на телефони да ги прилагодат своите чипови за работа со новите фреквенции. Во тој процес, SpaceX соработува со производители на уреди и модеми, а се шпекулира дека и Samsung развива компатибилни решенија.
Интересно е што SpaceX сега размислува и за сопствено производство на RF компоненти, што укажува на стремеж за поголема контрола врз целиот систем на комуникација помеѓу телефоните и сателитите кои орбитираат на висина од над 300 километри.
Во моментов, Starlink Mobile е достапен преку соработка со T-Mobile, а во иднина се очекува проширување и кон други оператори како Boost Mobile и US Mobile. Во меѓувреме, конкуренцијата не мирува – AT&T и Verizon развиваат сопствени решенија во соработка со компанијата AST SpaceMobile. Сè укажува дека влегувањето на SpaceX во развој на чипови не е само технички чекор, туку и стратешки потег кон целосна контрола на идната сателитска мобилна инфраструктура, пишува PCMAG.
