Google го донесе Gemini AI на Mac преку нова macOS апликација. Gemini за Mac може да се активира со кратенка на тастатура и има вградени алатки за генерирање слики, анализа на содржината на екранот, преглед на датотеки и многу повеќе.
Gemini е последната од трите главни AI услуги што добија наменска Mac апликација, бидејќи OpenAI и Anthropic веќе извесно време имаат свои Mac апликации.
На Mac може да се активира од било каде со комбинацијата на копчиња Option + Space, па нема потреба од префрлање во посебен прозорец. Комбинацијата Option + Shift + Space служи за отворање на целиот Gemini прозорец за разговор. До Gemini може да се пристапи и преку Dock-от или преку лентата со мени.
Секој прозорец на Mac може да се сподели со Gemini, што му овозможува да обезбеди контекстуална помош за сè што корисникот гледа. По активирањето на Gemini, изборот на опцијата „Share Window“ му овозможува на Gemini да види за што корисникот сака да постави прашања. Исто така, Gemini ќе бара дозвола за Accessibility пристап за да може да чита цели страници во прозорецот на прелистувачот.
AI моделот Nano Banana е достапен за креирање слики, додека Veo може да се користи за генерирање видеа.
Gemini за Mac е достапен за Mac компјутери со macOS 15 и понови верзии, а преземањето и користењето се бесплатни. Бесплатниот пристап до Gemini е ограничен, но Google нуди претплатнички планови со повисоки лимити за користење. Google AI Plus чини 7,99 долари месечно, Google AI Pro 19,99 долари, а Google AI Ultra 249,99 долари месечно.
Од Google велат дека Mac апликацијата е првиот чекор кон личен, проактивен и моќен десктоп асистент, а во наредните месеци следуваат уште новини.
