Транзиција на врвот на технолошкиот гигант: Џон Тернус ја презема функцијата CEO од 1 септември 2026 година, Кук ќе продолжи како Извршен претседател на компанијата
Актуелниот извршен директор на Apple, Тим Кук официјално најави дека ќе се повлече од функцијата на 1 септември 2026 година. Во пресрет на транзицијата, Кук сподели емотивно писмо до глобалната Apple заедница, осврнувајќи се на своето 15-годишно лидерство и врската со корисниците.
Во писмото, Кук истакнува дека секојдневно чита пораки од корисници ширум светот, кои споделуваат лични приказни за влијанието на Apple производите врз нивните животи – од здравствени моменти поврзани со Apple Watch, до професионални достигнувања овозможени преку Mac.
„Во секоја порака ја чувствувам заедничката човечност и одговорноста да продолжиме да создаваме подобри производи“, наведува Кук, додавајќи дека водењето на Apple било „чест и привилегија што тешко се опишува“.
Како дел од процесот на наследување, Џон Тернус ќе ја преземе позицијата извршен директор. Кук го опишува Тернус како „брилијантен инженер и лидер со длабоко разбирање за вредностите на Apple“, кој повеќе од две децении учествува во развојот на клучните производи на компанијата.
По повлекувањето од позицијата CEO, Кук ќе продолжи да биде дел од компанијата како извршен претседател на одборот, обезбедувајќи континуитет во стратешкото водење.
Џон Тернус изјави: „Длабоко сум благодарен за можноста да ја продолжам мисијата на Apple. Речиси целата моја кариера ја поминав во Apple и имав среќа да работам под водство на Стив Џобс, како и Тим Кук да ми биде ментор. Привилегија беше да учествувам во создавањето на производи и искуства што го променија начинот на кој комуницираме со светот и меѓусебно. Исполнет сум со оптимизам за тоа што можеме да постигнеме во годините што доаѓаат и среќен сум што најталентираните луѓе во светот се токму тука, во Apple, решени да бидат дел од нешто поголемо од секој од нас. Со голема скромност ја прифаќам оваа улога и ветувам дека ќе водам со вредностите и визијата што го дефинираат ова посебно место веќе половина век.“
Денешната најава претставува голема пресвртница за Apple. Кук ја извршува функцијата извршен директор од 2011 година, кога го наследи Стив Џобс, кој почина подоцна истата година.
За време на мандатот на Кук, Apple ја зголеми својата пазарна вредност од нешто помалку од 350 милијарди долари на денешна проценка од околу 4 трилиони долари.
Оваа транзиција претставува една од најзначајните лидерски промени во технолошката индустрија во последната деценија, со потенцијал да го одбележи следното поглавје во развојот на Apple, компанија која останува еден од глобалните лидери во иновации, дизајн и корисничко искуство.
