Meta воведе нова функција „live chat“ на социјалната мрежа Threads, која им овозможува на корисниците да учествуваат во разговори во реално време за настани што ги следат во живо и кои ги интересираат.
Live chat разговорите може да се одржуваат во рамки на Threads заедниците — дигитални простори наменети за специфични теми што Meta ги претстави минатата година.
Новата функција донекаде наликува на пристапот на Threads кон каналите за емитување на Instagram, но тие овозможуваат само еднонасочно испраќање пораки. Од друга страна, live chat разговорите на Threads може да ги водат избрани креатори, вклучувајќи Community Champions корисници кои се високо активни во одредени заедници, како и медиумски личности. Откако разговорот ќе се започне или закаже, домаќинот избира кој ќе биде поканет да учествува, а потоа може јавно да го сподели линкот.
Корисниците можат да објавуваат фотографии, видеа, линкови и емотикони, како и текстуални пораки. Доколку некој корисник не може да испраќа пораки во live chat што е веќе исполнет, сепак може да го следи, да реагира на пораки од други и да гласа во анкети. Live chat разговорите остануваат достапни за преглед и по нивното завршување, а корисникот не мора да биде дел од заедницата за да се приклучи.
Meta ја лансира новата социјална функција во заедницата NBAThreads за време на плејофот во NBA, а Malika Andrews, Rachel Nichols, Trysta Krick, David Rushing и Lexis Mickens се именувани како водители. Chat-от во живо ќе се појавува на врвот на feed-от на заедницата NBAThreads, а може да се споделува и како објава што ќе се појави на главниот feed на корисниците. Исто така, корисниците ќе гледаат црвен круг околу профилната фотографија на водителот кога е во live пренос.
Meta најави дека live chat функцијата постепено ќе се проширува во повеќе заедници на Threads, со дополнителни можности како co-hosting, widget за заклучен екран, како и можност за цитирање и споделување пораки од chat-от на корисничкиот feed.
Meta континуирано додава нови функции на Threads од неговото лансирање во 2023 година. Почна со мали теми што може да се пребаруваат и персонализирани feed-ови, а минатата година ги воведе заедниците. Исто така, започна со тестирање на подолги текстуални објави и неодамна доби долгоочекувано освежување на веб-верзијата. Компанијата во октомври објави дека нејзината текстуално ориентирана социјална платформа има 150 милиони дневно активни корисници.
