Во согласност со дизајнот на актуелниот iOS, новата апликација на Gemini ќе има Liquid Glass елементи со полупрозрачен интерфејс.
Google започна со постепено воведување на редизајнирана верзија на апликацијата Gemini за iOS, која носи освежен кориснички интерфејс и дополнителни можности за интеракција со четботот.
Највидливата промена се однесува на почетниот екран, кој сега вклучува анимирана позадина и визуелно нагласено поле за внес на пребарување. Покрај естетските измени, Google ја прошири и функционалноста на копчето за додавање содржина. Со притискање на знакот „+“ се отвора поширок сет на опции за пребарување, вклучувајќи слики, внес преку камера, музика, canvas, длабинско истражување и водено учење.
Новина е и картичката „more uploads“, која овозможува користење на датотеки и ресурси од NotebookLM. Во согласност со дизајнерските насоки на актуелниот iOS, апликацијата доби и Liquid Glass елементи, со полупрозрачен интерфејс и помодерен визуелен идентитет.
Се очекува редизајнираниот интерфејс на Gemini да пристигне и на Android, но сè уште не е познато кога.
