Samsung Device Care добива опција која автоматски ги става апликациите со чести рекламни известувања во „deep sleep“ режим
Samsung има решение за апликациите со премногу реклами, токму пристигнува кај Galaxy уредите. Функцијата што претходно беше забележана за време на тестирањето на верзијата One UI 8.5, сега се појавува на Galaxy телефоните преку ново ажурирање на апликацијата Device Care.
Според наводите на типстерот Kailash, Samsung започнал со испорака на Device Care верзијата 13.8.80.7, која ја носи опцијата „Block apps with excessive ads“. Оваа можност првпат беше спомната за време на тестирањето на One UI 8.5 софтверот, но тогаш не беше целосно јасно како ќе функционира во секојдневната употреба.
Samsung ја опишува функцијата прилично директно: апликациите што често испраќаат рекламни известувања ќе бидат ставени во „deep sleep“ режим за повеќе да не ги вознемируваат корисниците. Во пракса, тоа значи дека Device Care може да препознае апликации што агресивно испраќаат реклами и да ги замолчи кога ќе се открие такво однесување.
Samsung Device Care блокира напорни реклами
Основниот режим на блокирање препознава апликации што често испраќаат рекламни известувања и автоматски ги ограничува. Сепак, стабилната верзија сега открива и понапредна опција наречена „Intelligent blocking“.
Овој режим оди чекор понатаму, бидејќи ги анализира известувањата и проценува дали станува збор за реклами. Ако софтверот заклучи дека се реклами, особено кога се појавуваат често, таквите известувања ќе бидат блокирани. Samsung сепак предупредува дека системот може да направи грешка, што значи дека проценката нема секогаш да биде совршена.
Функцијата за блокирање апликации со премногу реклами се споменуваше уште на почетокот на декември, кога траги во програмскиот код на тест верзијата One UI 8.5 покажаа дека Samsung работи на ова решение. Тогаш не беше јасно дали ќе важи за целиот систем или само за одредени случаи. Според описот на режимот Intelligent blocking, изгледа дека решението на Samsung би можело да ги надгледува сите инсталирани апликации.
Добрата вест е што функцијата пристигнува со големото ажурирање One UI 8.5, по повеќемесечно тестирање. Samsung сега започна поширока испорака на новата верзија за модели како серијата Galaxy S25 во САД. Покрај блокирањето на напорните рекламни известувања, ажурирањето носи и AI проверка на повици, дополнителни алатки и помали подобрувања на корисничкиот интерфејс, пренесува Android Central.
