iPhone 20 наводно носи екран без отвор за предната камера, четири благо закривени рабови на екранот и целосно стаклено куќиште
Познатиот дигитален блогер Џон Просер објави рендер-илустрации од моделот iPhone 20, кој би требало да биде јубилеен телефон на Apple по повод 20 години од iPhone серијата. Според првичните информации, уредот се очекува во 2027 година, а Apple би можел да го прескокне iPhone 19 и да ја повтори стратегијата на голем дизајнерски скок, слично како кај моделот iPhone X по повод десетгодишнината.
Според овие тврдења, iPhone 20 би требало целосно да излезе од рамките на дизајнот на последните генерации. Најголемата промена е на предната страна, каде што се споменува екран без отвори, со четири благо закривени рабови и исклучително тенки рамки. Со тоа, односот меѓу екранот и куќиштето би достигнал највисоко ниво во историјата на Apple телефоните.
iPhone 20 носи екран без отвори и четири закривени рабови
Samsung се споменува како ексклузивен добавувач на екрани за овој модел. Наводно ќе развие специјален COE OLED панел без поларизатор за Apple, со четири благо закривени рабови, поголема пропустливост на светлина, помала потрошувачка и можност за изработка на поизразено закривен панел. Токму овој екран би требало да овозможи вистински приказ преку целата предна површина.
Телефонот наводно ќе користи целосна верзија на Face ID системот под екранот, како и предна камера под панелот. Со тоа Apple конечно би ги отстранил засекот и Dynamic Island, со што би се завршила повеќегодишната фаза на компромисен „цел екран“ со видливи отвори и исечоци.
Промените не завршуваат со екранот. iPhone 20 би требало да го напушти металниот рам со рамни рабови, кој Apple го користи со години, и да премине на позаоблен рам со помеки премини. Задната страна се опишува како едноделна, целосно стаклена површина без видливи споеви, со почист и попремиум изглед.
Задниот модул за камера наводно преминува на хоризонтален распоред, сличен на решението што се поврзува со моделот iPhone Air. Се споменува и можност за премин на solid-state копчиња наместо класични физички копчиња, со што куќиштето дополнително би се поедноставило. Како јубилеен модел, iPhone 20 би можел да стане најголемата дизајнерска промена уште од iPhone X.
Сепак, бидејќи станува збор за рани рендери и неофицијални информации, сите детали треба да се земат со голема резерва. Доколку гласините се покажат точни, Apple со овој модел би можел повторно да влијае врз правецот на развој на флегшип телефоните, особено кога станува збор за екрани со четири закривени рабови и предна страна без отвори, наведува FPT.
