Meta повеќе не сака да живее само од реклами: Instagram, Facebook и WhatsApp воведуваат претплати и платени AI функции. Еве кои предности ги носат
Компанијата Meta Platforms официјално започна нова ера на своите социјални мрежи. По неколку месеци тестирања и гласини, Meta ги претстави платените претплати за Instagram, Facebook и WhatsApp, со потврда дека компанијата планира дополнителни премиум сервиси, вклучувајќи и напредни AI претплати.
Новата стратегија претставува една од најголемите промени во деловниот модел на Meta екосистемот од настанувањето на Facebook во 2004 година. Платформите кои со децении функционираа речиси исклучиво преку рекламирање сега за првпат сериозно воведуваат модел на директно наплаќање на корисниците.
Според информациите што ги пренесуваат TechCrunch и The Verge, новите пакети под имињата „Instagram Plus“, „Facebook Plus“ и „WhatsApp Plus“ носат дополнителни функции за корисниците кои сакаат проширени можности на апликациите.
Instagram Plus, меѓу другото, овозможува анонимно гледање на Story објави, подолго траење на содржината и дополнителни опции за промоција на објави, додека Facebook Plus ги проширува можностите на Story функцијата и интеракцијата со содржината. WhatsApp Plus засега е фокусиран на помали, но практични додатоци како поголем број прикачени разговори и ексклузивни налепници.
Цените засега остануваат релативно ниски. Facebook Plus и Instagram Plus чинат по 3,99 долари месечно, додека WhatsApp Plus е поставен на 2,99 долари.
Сепак, многу поважниот дел од целата приказна се крие зад Meta AI плановите.
Компанијата паралелно воведува две нови претплати за своите AI сервиси под имињата „Meta One Plus“ и „Meta One Premium“. Основниот пакет ќе чини 7,99 долари месечно, додека премиум верзијата ќе изнесува 19,99 долари и ќе вклучува поголеми лимити за генерирање слики и видеа, како и понапредни AI функции.
Тоа практично значи дека Meta за првпат сериозно ја монетизира генеративната вештачка интелигенција во своите апликации.
Досега Meta AI главно беше бесплатен додаток интегриран во Facebook, Instagram и WhatsApp, но растот на трошоците за развој на AI инфраструктура очигледно ја тера компанијата да најде нови извори на приходи. Meta Platforms оваа година планира огромни инвестиции во AI инфраструктура, дата центри и развој на сопствени чипови, додека аналитичарите проценуваат дека најголемите технолошки компании заедно ќе потрошат стотици милијарди долари на AI до 2026 година.
Meta веќе со години се обидува да ја намали зависноста од дигиталното рекламирање, кое и понатаму претставува огромно мнозинство од приходите на компанијата. Проблемот е што AI револуцијата драматично ги зголемува трошоците за работење. Тренирањето големи јазични модели, одржувањето GPU инфраструктура и развојот на мултимодални AI системи стануваат сè поскапи, дури и за компании со големина на Meta.
Затоа целата технолошка индустрија полека се свртува кон претплатнички модели. OpenAI веќе има повеќе нивоа на претплата за ChatGPT, Google развива Gemini Advanced пакети, додека Microsoft агресивно ги турка Copilot претплатите низ Windows и Office екосистемот.
Meta досега беше релативно внимателна по ова прашање, главно затоа што нејзините платформи имаат милијарди корисници навикнати на целосно бесплатно користење на сервисите. Токму затоа реакцијата на јавноста ќе биде многу важна.
Засега Meta тврди дека основните функции на апликациите остануваат бесплатни и дека новите претплати се однесуваат само на дополнителни можности и AI алатки.
Сепак, дел од корисниците веќе изразуваат загриженост дека ова би можело да биде почеток на поширока трансформација на социјалните мрежи кон модел во кој најдобрите алатки, поголемиот досег и понапредните функции ќе бидат резервирани за корисници кои плаќаат месечни претплати.
Интересно е и тоа што Meta не застанува само на индивидуалните корисници. Компанијата наводно подготвува и посебни AI и productivity пакети за креатори на содржина и бизниси, вклучувајќи алатки за подобра видливост на објави, автоматизација на комуникација и AI асистенција за водење на налози.
Во позадина на сè се наоѓа и голем притисок од инвеститорите. Meta последниве години вложува огромни суми пари во AI развој, сопствени чипови, дата центри и wearable уреди како Ray-Ban Meta очилата. Инвеститорите сè повеќе очекуваат конкретен поврат на тие вложувања.
Затоа новите претплати веројатно се само почеток на многу поширока стратегија за монетизација на AI сервисите во Meta екосистемот
