На дното на океанот е пронајден прототип од претстојниот Pixel Watch 5 на Google, а според објавените фотографии изгледа дека новиот модел нема да донесе поголеми дизајнерски промени.
Протекувањето информации за претстојните уреди на Google не е толку невообичаено, но овој најнов случај дефинитивно е. Имено, прототип од претстојниот Pixel Watch 5 наводно е пронајден ни помалку ни повеќе – на дното на Атлантскиот океан.
„Мој пријател го пронајде овој часовник пред неколку дена под вода, додека нуркаше во близина на островот Сент Мартин. Забележал дека задната страна на часовникот укажува дека станува збор за Google Pixel Watch 5, кој сè уште не е ниту претставен, а камоли пуштен во продажба“, објави на X Ренди Пичфорд, коосновач на Gearbox Software, студио познато по серијалот Borderlands.
Пичфорд наведува дека часовникот имал доволно енергија да го прикаже времето, но главната батерија е испразнета и не може да се вклучи. Врз основа на објавените фотографии, може да се забележи дека Pixel Watch 5 изгледа идентично како неговите претходници, а на задната страна на уредот има ознаки кои упатуваат на IP68 заштита од вода и прашина, што би можело да објасни зошто часовникот преживеал на дното на океанот.
Ознаките на задната страна исто така укажуваат на присуство на сензор за срцев ритам, UWB чип, пулсен сензор, SpO2 сензор, како и можност за следење на температурата на кожата. Станува збор, значи, за карактеристики кои се очекуваат од модерен паметен часовник од повисока класа и кои, на крајот на краиштата, ги очекувавме и од Pixel Watch 5.
Google засега не се огласи за овој необичен пронајдок, а ако може да се претпостави, веројатно и нема.
