Португалски истражувачи развиваат графенски материјал кој би можел драстично да го намали радарскиот одраз на воените авиони и дронови.
Португалија развива материјал базиран на графен кој може значително да ја намали видливоста на дроновите и воените авиони на радар, што би ѝ овозможило на Европа важна позиција во развојот на „stealth“ (стелт) технологијата.
Проектот го предводи компанијата GTechPlasma, која произлегува од Институтот за плазма и нуклеарна фузија при Instituto Superior Técnico во Лисабон. Тимот развил систем кој со помош на плазма произведува висококвалитетни графенски материјали, чии својства можат да се приспособуваат за различни намени.
Моменталниот фокус на проектот е развој на премази што апсорбираат радарски бранови и друго електромагнетно зрачење. Наместо да го рефлектираат испратениот сигнал назад кон радарот, овие материјали апсорбираат дел од енергијата, со што го намалуваат радарскиот потпис на објектот.
Графенскиот премаз би можел да го намали радарскиот потпис на F-16 до ниво на птица
Според проценките на истражувачите, премазот би можел толку да го намали радарскиот одраз на авионот F-16 што на радар би изгледал како птица. Тоа не значи дека авионот би станал буквално невидлив, туку дека би бил значително потежок за откривање, следење и правилна идентификација.
Ваквата способност претставува голема предност во воените операции, бидејќи непријателскиот радар би го открил авионот подоцна отколку без ваков премаз. Со тоа, екипажот добива повеќе време за извршување на задачата, додека системите за противвоздушна одбрана располагаат со пократок период за реакција.
Графенот претставува слој од јаглеродни атоми со дебелина од само еден атом. GTechPlasma го произведува од материјали како етанол и метан, користејќи плазма-технологија која овозможува контрола на структурата на атомско ниво.
Компанијата наведува дека може да го приспособува бројот на слоеви, составот и другите својства на графенските материјали според барањата на конкретната примена. Досега се развиени шест различни формулации на премази за електромагнетна заштита и стелт-намена.
Слични решенија се ретки и се под строга контрола. Истражувачите посочуваат дека материјалот што се користи кај американскиот авион F-35 не е достапен за извоз, поради што развојот на европска технологија од овој тип има особено стратешко значење.
Во моментов, GTechPlasma произведува околу 40 милиграми висококвалитетен графен во минута. Компанијата планира да го зголеми производството со помош на индустрискиот партнер Plasmaphene, кој ќе ја приспособи развиената опрема за поголеми производствени капацитети.
Првите чекори кон практична примена веќе се направени. На португалски производител на дронови му се испорачани 260 грама материјал за апсорпција на радарски бранови.
Материјалот моментално се произведува во форма на исклучително лесен црн прав, но целта е да се понудат готови премази и бои што ќе можат директно да се нанесуваат на површините на дронови, авиони и друга опрема.
Покрај воената примена, истата технологија би можела да се користи и за електромагнетна заштита, складирање водород, како и за издвојување на ретки земни елементи и ураниум. Сепак, можноста за намалување на радарскиот одраз во моментов се смета за нејзина најважна и најатрактивна примена, пренесува EuroNews.
