Компанијата Samsung мораше да направи одредени компромиси за новите модели на преклопни телефони да добијат екран без видлив набор, но за среќа тие не се драматични.
Според порталот GSMArena, Samsung се подготвува на својот голем настан во Лондон, закажан за 22 јули, официјално да ја претстави новата генерација преклопни телефони – Galaxy Z Fold8 и Galaxy Z Fold8 Ultra.
Во пресрет на премиерата, најновите информации што ги објави познатиот технолошки инсајдер Ice Universeоткриваат дека отстранувањето на најголемиот естетски недостаток кај овие уреди носи и неизбежен технички компромис.
Радикално редизајнирана шарка за екран без набор
Јужнокорејскиот технолошки гигант целосно го редизајнирал механизмот на шарката во споредба со минатогодишниот Galaxy Z Fold7. Целта е да се добие речиси совршено рамен екран, кој би можел да биде меѓу најдобрите во индустријата.
Според достапните информации, новиот екран ќе има набор кој е практично невидлив и речиси невозможно да се почувствува при допир. Со тоа Samsung директно ќе му конкурира на Oppo Find N6, но и на првиот преклопен телефон на Apple. Се очекува дека iPhone Ultra ќе има сличен, целосно рамен преклопен екран без видлив набор, но тоа ќе стане јасно дури по премиерата на Apple, закажана за 8 септември.
Компромис при отворањето и позиционирањето
За да се постигне совршено рамен екран кога телефонот е отворен, новата шарка морала да биде значително поцврста и со подиректен механизам на движење. Оваа промена влијае на секојдневната употреба, бидејќи телефонот повеќе нема лесно да може да останува во произволен агол при отворање.
Новиот механизам е дизајниран така што природно тежнее кон две крајни позиции – целосно отворена или целосно затворена.
Таквиот пристап значително го менува препознатливиот Flex Mode, кој досега им овозможуваше на корисниците да го постават телефонот полуотворен на рамна површина и да го користат како мини-лаптоп за видеоповици или фотографирање без статив.
Со новата генерација, стабилното задржување на екранот ќе биде можно само под неколку однапред дефинирани агли. Тоа е компромис направен во корист на совршено мазната површина на екранот кога уредот е целосно расклопен.
