Xbox Series X поскапува во Европа за дури 200 евра

Откако во јуни најави поскапување без да ги објави европските цени, Microsoft сега го претстави новиот ценовник, кој покажува дека европските купувачи за одредени модели ќе плаќаат и до 200 евра повеќе.

Microsoft ги објави новите европски цени на Xbox конзолите, кои стапуваат во сила од почетокот на август. Новиот ценовник потврдува дека европските купувачи ќе бидат погодени од значително поголеми поскапувања отколку што првично се очекуваше, при што некои модели поскапуваат и до 200 евра.

Како што се очекуваше, најголемо зголемување на цената има Xbox Series X со 1 TB меморија и оптички уред, чија препорачана малопродажна цена порасна од 599,99 евра на 799,99 евра, односно за цели 200 евра. Истото зголемување важи и за дигиталната верзија на конзолата со 1 TB меморија, која сега чини 749,99 евра, наместо досегашните 549,99 евра.

Ниту поевтините модели не останаа поштедени. Xbox Series S со 512 GB меморија поскапе од 349,99 на 499,99 евра, додека верзијата со 1 TB меморија се зголеми од 399,99 на 599,99 евра.

Microsoft уште во јуни најави дека новите цени ќе стапат во сила на 1 август и ќе важат на сите светски пазари, но тогаш не ги објави европските цени. Да потсетиме, ова е трето поскапување на Xbox конзолите од мај минатата година.

Воедно, потврдено е дека Microsoft ја повлекува од понудата Xbox Series X со 2 TB меморија.