Honor го претстави својот систем за обработка на слика што ги обединува чипот, уредот и облакот, најави заедничка лабораторија со ARRI за развој на технологии за снимање и ги донесе ARRI LogC3, ARRI Wide Gamut 3 и ARRI Looks на Honor Robot Phone.
Honor, глобалната компанија која развива екосистем на AI уреди, на настанот HONOR Imaging Technology Launch во Хенгдијан ги претстави своите најнови технологии за мобилно снимање и покажа како професионалниот филмски начин на работа може да се прилагоди за мобилно создавање содржини.
На настанот, HONOR го претстави принципот Optics-Intelligence Evolution, врз кој се темели неговата стратегија за развој на технологиите за снимање, го претстави HONOR AiMAGE – систем за обработка на слика што ги обединува чипот, уредот и облакот – и го најави формирањето на заедничка лабораторија со компанијата ARRI за развој на технологии за снимање.
На презентацијата говореа Харалд Брендел, директор на одделот Image Science во ARRI, оскаровецот Клаудио Миранда, кинематограферот Ванг Боксуе, главниот инженер на HONOR за технологии за снимање Луо Веи и експертот за перцепција на слика во HONOR Жао Фучен. Тие зборуваа за тоа како професионалните филмски технологии и продукциски процеси можат да им се доближат на авторите кои создаваат содржини со мобилни уреди.
Со ова претставување, HONOR направи значителен исчекор во својата стратегија за развој на технологиите за снимање. Наместо да се фокусира исклучиво на спецификациите на камерата, компанијата развива сеопфатен систем за мобилно снимање што опфаќа професионално снимање, обработка со вештачка интелигенција, филмска наука за боите и работни процеси прилагодени за креаторите на содржини.
„Мобилната фотографија долго време беше насочена кон натпревар во бројот на пиксели, големината на сензорот и хардверските спецификации“, изјави Луо Веи, главен инженер на HONOR за технологии за снимање. „Но, во време кога речиси сите создаваат видео содржини, на корисниците им е потребно повеќе од технички параметри. Потребни им се алатки што ќе ја пренесат нивната креативна визија и ќе им овозможат да создаваат содржини кои носат емоција, приказна и филмски израз. Токму тоа е целта на HONOR AiMAGE – на секој корисник да му овозможи поголема слобода да ја сними и изрази својата креативност.“
HONOR AiMAGE: Сеопфатен систем за обработка на слика
За време на главната презентација, HONOR го претстави принципот Optics-Intelligence Evolution, сумиран во пораката: „Оптиката е темелот, а интелигенцијата ги поместува границите.“ Според компанијата, напредокот во мобилното снимање се заснова на паралелен развој на физичкото снимање и интелигентната обработка на сликата. Оптиката и можностите на сензорите ја создаваат основата за квалитетна слика, додека вештачката интелигенција, алгоритмите и cloud-технологиите ги прошируваат креативните можности на корисниците.
За да го поддржи овој пристап, HONOR го разви AiMAGE, систем за обработка на слика што ги обединува чипот, уредот и облакот и го поврзува целиот процес – од снимањето до интелигентното креирање на содржината.
На ниво на чип, HONOR развива сопствен AI ISP базиран на Transformer модел, кој темелно го редефинира процесот на обработка на сликата. Во комбинација со новата генерација распоред на пиксели и EVS технологијата на сензорите, ова решение го подобрува квалитетот на оригинално снимената слика и обезбедува поквалитетни влезни податоци за обработка со вештачка интелигенција.
На ниво на уред, HONOR ги интегрира хардверот за снимање и алгоритмите за обработка на слика во реално време. Ова вклучува интерно развиен трoосен стабилизатор изработен од титаниумска легура, високопрецизни сензори, напредни оптички технологии и алгоритми за обработка во реално време, кои овозможуваат подобра синхронизација меѓу хардверската стабилизација, квалитетот на сликата и контролата на движењето.
На cloud-ниво, HONOR дополнително ги проширува можностите на системот преку обработка на сликата во RAW доменот, технологии за просторно снимање и алатките Imaging Agent. Овие cloud-функции се дизајнирани да ги надминат ограничувањата на обработката на самиот уред и да го поддржат целиот креативен процес – од снимање и оптимизација до интелигентно генерирање содржини.
ARRI технологиите пристигнуваат на HONOR Robot Phone
Преку стратешката технолошка соработка со ARRI, HONOR интегрира избрани елементи од професионалниот филмски начин на работа во мобилните технологии за снимање. Тоа ги вклучува ARRI LogC3, ARRI Wide Gamut 3 и ARRI Looks, со што на HONOR Robot Phone пристигнуваат професионална репродукција на бои и технологии што се користат во филмската индустрија.
За разлика од обичните филтри, LogC3 и ARRI Looks се дел од професионален систем за обработка на слика. LogC3 е дизајниран да зачува повеќе информации за осветлувањето и боите за постпродукција, додека ARRI Wide Gamut 3 обезбедува поширок опсег на бои, а ARRI Looks им овозможува на авторите примена на контролирани филмски стилови. Заедно, овие технологии обезбедуваат поголема флексибилност во текот на целиот процес – од снимањето до монтажата – и овозможуваат мобилните снимки да задржат повеќе детали за креативна обработка.
„Повеќе од еден век ARRI им помага на филмските автори да ја претворат технологијата во впечатливи визуелни приказни“, изјави Харалд Брендел, директор на одделот Image Science во ARRI. „Нашата соработка со HONOR не е само партнерство меѓу два бренда, ниту се сведува само на неколку филмски филтри. Нашата цел е професионалните стандарди за репродукција на бои и филмскиот начин на работа да ги доближиме до мобилното создавање содржини. Заедно истражуваме како ARRI Image Science и професионалните филмски процеси можат да им помогнат на повеќе автори да создаваат снимки со поголема доследност, контрола и креативна намера.“
За дополнително унапредување на соработката, HONOR и ARRI го најавија формирањето на заедничка лабораторија за развој на технологии за снимање. Лабораторијата ќе се фокусира на три клучни области: оптика на ниво на сензор и динамички опсег, целосниот филмски продукциски процес – од снимање до постпродукција – и стандардите за веродостојна репродукција на сликата и визуелната естетика во ерата на вештачката интелигенција. Преку оваа иницијатива, HONOR и ARRI ќе истражуваат како принципите на професионалната филмска продукција можат да се применат во следната генерација технологии за мобилно снимање.
Мобилното снимање како дел од професионалната филмска продукција
На настанот говореа и познати филмски автори, меѓу кои оскаровецот Клаудио Миранда и кинематограферот Ванг Боксуе, кои зборуваа за тоа како мобилните технологии за снимање можат да придонесат за поголема флексибилност во професионалното филмско творештво.
HONOR го покани Клаудио Миранда со HONOR Robot Phone повторно да создаде филмска сцена и да покаже како мобилните технологии можат да го доближат професионалниот филмски израз до поголем број автори. Од перспектива на искусен филмски професионалец, Миранда истакна дека мобилните уреди стануваат сè поспособни за снимање кадри со филмски квалитет во секојдневни услови.
Компанијата прикажа и краток филм што Ванг Боксуе го сними со HONOR Robot Phone во еден кадар и во исклучително ограничен простор. Потпирајќи се на своето искуство во филмската продукција, Ванг истакна дека верната репродукција на боите и компактните димензии на уредот значително ја олеснуваат професионалната постпродукција и овозможуваат поголема слобода во движењето на камерата и обликувањето на сцената.
„Доследната репродукција на боите и компатибилноста со професионалните продукциски процеси се од клучно значење во филмската продукција“, изјави Ванг Боксуе. „Не ме воодушеви само квалитетот на сликата, туку и тоа што компактен мобилен уред може да снима на места до кои традиционалните филмски камери не можат да пристапат. Тоа им овозможува на авторите поголема слобода во движењето на камерата, ја намалува сложеноста на продукцијата и отвора нови креативни можности.“
Проширување на HONOR екосистемот за мобилно снимање
На настанот HONOR го претстави жирито на HONOR Mobile Imaging Plan – HONOR Magic Stories Awards 2026, глобален натпревар во областа на мобилното снимање. Како важна платформа за реализација на визијата на компанијата за развој на технологиите за снимање, натпреварот ги обединува експертите од светот на филмот, визуелното раскажување приказни и фотографијата со цел да се поттикне покреативно мобилно творештво.
HONOR го претстави и предизвикот „48-Hour Extreme Filmmaking Challenge“, кој ќе се одржи во Hengdian World Studios. Во рамките на предизвикот, тимови од автори ќе ги користат најновите технологии на HONOR за мобилно снимање во сложени филмски сценарија, вклучувајќи паркур при големи брзини, комплексни сцени снимени во еден кадар и акциони секвенци од ниска перспектива. Избраните проекти ќе бидат претставени во следната фаза од иницијативата.
