Компанијата OpenAI објави дека корисниците на ChatGPT кои ја користат бесплатната верзија, како и најевтиниот платен пакет Go, ќе добијат неограничени текстуални разговори без автоматско префрлање на послаб модел.
Кога станува збор за моделите, GPT-5.6 Luna, најмалиот од трите GPT-5.6 модели претставени во јули, ќе стане стандарден модел за корисниците на бесплатната верзија и пакетот Go, заменувајќи го стариот (според стандардите на вештачката интелигенција) GPT-5.5 Instant.
Преминот кон GPT-5.6 Luna ќе се случи во текот на оваа недела, додека неограничените текстуални разговори ќе станат достапни следната недела. Тогаш бесплатните и Go корисниците ќе добијат пристап и до новото копче Think, кое ќе им овозможи да изберат колку „размислување“ ChatGPT ќе вложи во своите одговори. Иако повеќе нема да има ограничувања за текстуалните разговори, бесплатните и Go корисниците и понатаму ќе имаат ограничувања за прикачување датотеки и генерирање слики.
OpenAI истовремено го подобрува и главниот модел GPT-5.6 Sol, кој е достапен само за корисниците што плаќаат претплата Plus или Pro. Според компанијата, ажурирањата се „дизајнирани да обезбедат подиректни одговори, подобро структурирање и да избегнат непотребни детали кога тие не се корисни“.
Доколку поставите кратко прашање, ќе добиете „директен одговор со контекстот што ви е потребен“, додека при повеќечекорно планирање или истражување ќе добиете „посеопфатен одговор во кој главната препорака останува јасно истакната“.
Новиот GPT-5.6 Sol е дизајниран и да прави помалку грешки, особено кога станува збор за бројки, датуми, извори, правила или претпоставки. OpenAI наведува дека при интерното тестирање на финансиски, медицински и правни прашања кои бараат прецизни фактички информации, одговорите што содржеле барем една фактичка грешка биле околу 68 проценти поретки кај новиот GPT-5.6 Sol во споредба со моделот GPT-5.5 Instant.
За претплатниците на пакетите Plus и Pro, копчето Think ќе биде претворено во лизгач (slider) што ќе овозможи преминување од нивото Instant до Pro во однос на степенот на „размислување“, при што ќе се задржат истиот тон и стил на одговорите. OpenAI наведува дека ChatGPT може да се користи на најбрзото ниво за „секојдневни прашања“, а потоа нивото да се зголеми за „планирање, истражување, пишување, програмирање или носење одлуки што бараат подлабоко размислување“.
Интересно е што верзијата на моделот GPT-5.6 Sol што ги напојува ChatGPT Work и Codex не се менува со ова ажурирање. Новиот модел опишан погоре е „оптимизиран за секојдневни разговори“, па затоа ќе биде достапен исклучиво во Chat искуството.
