Легендарниот дизајнер на iPhone и останатите Apple уреди, Џони Ајв работи на уред за OpenAI: паметен звучник доволно мал за да го собере на дланката. Уредот ќе пристигне во време на судски спор со Apple, кој би можел да го искомплицира неговото лансирање.
OpenAI подготвува паметен звучник без екран, со форма налик на крофна и приближно со големина на хокеарски пак. Станува збор за пренослив уред со батерија, дизајниран да се смести во едната рака и да функционира во различни позиции — на дланка, ноќна масичка или кујнски пулт.
Уредот има решетки за звучникот, микрофони и светла кои покажуваат кога уредот слуша. Подвижните делови, според описот што го објавува Bloomberg, повикувајќи се на Марк Гурман, би требало да му дадат одредена доза на личност и да го направат пожив од статичните паметни звучници што ги нудат Amazon и Google.
Камерата и дополнителните сензори ќе собираат визуелни информации од околината и ќе ги испраќаат до AI моделот.
Ќе учи за корисникот и ќе ги прилагодува разговорите
Функционално, уредот ќе работи слично на гласовниот режим на ChatGPT во мобилните апликации, но со понапредни модели за поприродна интеракција.
Замислен е со текот на времето да учи за корисникот и да ги прилагодува разговорите, со што OpenAI цели да создаде впечаток на соговорник, а не само алатка.
Звучникот е дизајниран во соработка со студиото LoveFrom на Jony Ive, дизајнерот кој го дефинираше изгледот на iPhone, iPad и Apple Watch.
Разгледуваната цена се движи меѓу 300 и 400 долари по примерок, што е повеќе од цената на повеќето паметни звучници, но сепак под нивото на стандардниот iPhone.
Минатото на Ајв може да го искомплицира проектот
Apple го тужеше OpenAI, тврдејќи дека компанијата присвоила негова интелектуална сопственост, а во тужбата се споменува и обработката на металот на уредот.
Според тврдењата на Apple, OpenAI од долгогодишен добавувач на Apple побарал техника за обработка и завршна обработка на металот слична на онаа што ја користи Apple, наводно оставајќи впечаток дека за тоа има дозвола од Apple.
OpenAI ги отфрла овие тврдења како, според Bloomberg, „премногу општи и нејасни“, притоа наведувајќи дека не е јасно дали тие воопшто се однесуваат на овој уред.
OpenAI во средата вечерта поднесе барање за отфрлање на тужбата, во кое тврди дека создава нешто целосно различно од што било што постои во Apple.
Компанијата постапката ја опиша како невнимателна, агресивна и невообичаено лична, а адвокатот Patrick Curran во писмо до правните застапници на Apple напиша дека тужбата ги напаѓа вообичаените деловни практики.
Внатрешната истрага што OpenAI ја спровел по поднесувањето на тужбата, наводно, заклучила дека уредот не користи деловни тајни на Apple.
Сепак, барањето на Apple за привремена забрана, доколку биде прифатено, би можело да го искомплицира излегувањето на уредот на пазарот. OpenAI планира претставување до крајот на оваа година, додека достапноста за корисниците е планирана за 2027 година.
Новиот хардвер како доказ?
Формата на крофна и преносливиот звучник се нешто што Apple засега нема претставено, бидејќи HomePod нема верзија со батерија ниту уред фокусиран на вештачка интелигенција.
Уредот кој би требало да покаже дека OpenAI не го копира Apple постои, барем делумно, токму поради потребата компанијата да одговори на обвиненијата дека го прави токму тоа.
