Spotify најави нова ознака за AI изведувачи наречена „AI Persona“, која има за цел да им сигнализира на слушателите дека идентитетот на изведувачот можеби е генериран со вештачка интелигенција и дека „не претставува вистинска личност“, соопшти компанијата. Ознаката ќе почне да се појавува во средината на септември.
Интересно е што ова нема да се применува само на профилите на изведувачи кои самите ќе се означат како AI Persona, туку Spotify ќе ја додаде и на други „релевантни профили“, бидејќи компанијата е „фокусирана на промовирање музика од автентични изведувачи кои градат кариера во музиката“.
Според стандардните поставки, сè што ќе создадат овие AI Persone ќе биде исклучено од сите уреднички или алгоритамски препораки. Сепак, нивната музика и понатаму ќе им се појавува во препораките на корисниците кои ги следат.
Изведувачите веќе можат самите да се означат како AI Persone, а Spotify исто така ќе ги прегледува профилите на изведувачите и ќе ги идентификува оние чиј јавен идентитет, вклучувајќи го името и фотографиите на профилот, „изгледа како да претставува фотореалистични идентитети генерирани со вештачка интелигенција“.
Во средината на септември ознаката AI Persona ќе се појавува на профилите на изведувачите, во банер и во делот „About“, во резултатите од пребарувањето и покрај песните во плејлистите.
Кога корисникот ќе ја допре ознаката, ќе може да види дали изведувачот самиот се означил како AI Persona или Spotify морал да го прегледа неговиот профил и да „донесе информирана одлука“.
Доколку Spotify го направи тоа, изведувачите ќе добијат можност да поднесат жалба. Во наредните месеци и корисниците на Spotify ќе добијат можност да пријавуваат профили на изведувачи за кои сметаат дека се AI Persone.
Spotify нагласува дека ознаката AI Persona „се однесува на јавниот идентитет на изведувачот, а не на начинот на кој е создадена музиката“. За повеќе информации за тоа како е создадена самата музика, Spotify ги има функциите AI Credits и SongDNA.
Компанијата наведува дека нејзиниот пристап кон вештачката интелигенција ќе продолжи да се развива во согласност со целокупниот музички екосистем и дека настојува во своите препораки „да не вклучува спам, неквалитетна содржина или содржина создадена со минимален труд“.
