На 30 септември 2026 година, во Хајделберг Факултет – Скопје, ќе се одржи 7-та Германско-македонска конференција за контролинг, оваа година под мотото „Актуелни предизвици во контролингот – вештачка интелигенција, дигитализација и развој на нови компетенции“.
Конференцијата ја организираат Германската стопанска комора во странство и Хајделберг Факултет – Скопје, во партнерство со Академијата за банкарство и информатичка технологија – АБИТ, Центар за управување со перформанси и контролинг при Франкфуртската школа за финансии и менаџмент, Институтот на сметководители и овластени сметководители – ИСОС и стопанските комори во Северна Македонија.
Годинешното издание ќе биде посветено на промените кои вештачката интелигенција и дигитализацијата ги носат во контролингот и финансиското управување, како и на новите знаења и вештини кои ќе бидат потребни за успешна работа во професијата. Посебно внимание ќе биде посветено на употребата на податоци и вештачка интелигенција при донесувањето деловни одлуки, дигитализацијата на финансиските процеси, иднината на сметководството и контролингот и управувањето со ризици.
„Контролингот денес не е само известување за минатото, туку систем кој му помага на менаџментот навреме да ги препознае ризиците, правилно да ги насочи ресурсите и да донесува подобри одлуки. Со седмото издание на конференцијата продолжуваме да ја зајакнуваме врската меѓу германското знаење, македонската деловна практика и реалните потреби на компаниите“, истакнува проф. д-р Синиша Наумоски, генерален менаџер на Хајделберг Факултет – Скопје.
Конференцијата ќе опфати две стручни сесии и шест тематски панели, на кои ќе се дискутира за контролингот во технологијата, банкарството, телекомуникациите, производството и осигурувањето, како и за компетенциите што ќе ја обликуваат професијата во наредните години.
„Дигиталните алатки и вештачката интелигенција отвораат големи можности, но нивната вистинска вредност се постигнува кога се поврзани со јасни процеси, релевантни показатели и професионално деловно расудување“, посочува проф. д-р Роналд Глајх, професор по Management Practice & Control и академски директор на Центар за управување со перформанси и контролинг при Франкфуртската школа за финансии и менаџмент.
Во рамки на конференцијата ќе учествуваат финансиски директори, контролери, сметководители, претприемачи, членови на управни и надзорни органи, претставници на финансискиот и индустрискиот сектор, професори, експерти и млади професионалци.
Конференцијата ќе се одржи од 09:30 до 18:00 часот во просториите на Хајделберг Факултет – Скопје, на ул. „Коста Новаковиќ“ бр. 16. Рокот за пријавување е 29 септември 2026 година, а бројот на учесници е ограничен. За информации и пријавување, заинтересираните можат да се обратат на info@heidelberg.edu.mk или на телефон +389 70 355 656.
