Instagram претстави нов изглед на својот препознатлив wordmark, заменувајќи го курзивниот фонт што го користеше во изминатата деценија.
Новото лого е комбинација од курзивни и класични букви, со поедноставен и помодерен изглед. Сепак, промената веднаш предизвика реакции кај корисниците, особено поради начинот на кој изгледаат одредени букви во новиот wordmark. Дел од корисниците забележаа дека наместо „Instagram“, логото на моменти изгледа како да пишува „Instagzam“.
Шефот на Instagram, Адам Мосери, ја објави промената на својот профил и објасни дека wordmark-от на врвот на апликацијата не бил променет 10 години, па било време за освежување.
„Почист и помодерен, со референци кон оригиналот и едноставноста и вниманието кон деталите што отсекогаш го карактеризирале Instagram“, објасни Мосери.
Мосери очигледно очекуваше различни реакции, па новиот wordmark го сподели и на Threads, каде што ги повика корисниците да ги споделат своите мислења.
Instagram на својот дизајнерски профил на Threads покажа и неколку други верзии на фонтови кои биле разгледувани во процесот на редизајн. Интересно е што дел од нив беа значително полесни за читање од финалната верзија.
Реакциите на корисниците се поделени. Дел од нив жалат по препознатливиот курзивен wordmark, кој со години беше составен дел од визуелниот идентитет на Instagram, додека други позитивно го прифаќаат новиот, помодерен изглед.
Промената засега се однесува на wordmark-от на Instagram, додека препознатливата икона на апликацијата останува основен дел од визуелниот идентитет на платформата.
