Новите CAD рендери укажуваат дека Samsung за Galaxy S27 Ultra подготвува голем испакнат модул за камерите, налик на оној кај iPhone 17 Pro, што можеби нема да им се допадне на сите.
Новиот CAD рендер кој протече во јавноста покажува дека Galaxy S27 Ultra ќе има значително поинаков распоред на камерите, а особено внимание привлекува неговата сличност со iPhone 17 Pro.
Според рендерот што го објави познатиот leaker Ice Universe, Galaxy S27 Ultra би можел да добие голем испакнат дел на задната страна во кој се сместени камерите. Таквото решение потсетува на дизајнот што Apple го користи кај iPhone 17 Pro, што би можело да им пречи на дел од корисниците на Samsung кои од Ultra моделите очекуваат препознатлив и визуелно издвоен дизајнерски идентитет.
Сепак, сличноста не е целосна. На прикажаниот Galaxy S27 Ultra, два сензора имаат одделни кружни отвори, додека третата камера заедно со блицот се наоѓа во издолжен отвор во форма на капсула. И покрај тоа, самата идеја за голема испакната површина која се протега по задната страна тешко може да остане незабележана кога телефонот ќе се спореди со актуелните Pro модели на Apple.
Според Ice Universe, во издолжениот отвор би можела да се наоѓа телефото камера со 5x оптички зум. Претходните гласини наведуваат дека токму таа би требало да ја замени 3x телефото камерата која ја користи Galaxy S26 Ultra.
Досегашните информации укажуваат и дека Galaxy S27 Ultra би можел да има една задна камера помалку од својот претходник, иако засега нема доволно сигурни информации за со сигурност да се каже како ќе изгледа конечната конфигурација.
Дополнителна забуна предизвика leaker-от Sonny Dickson, кој објави уште два наводни CAD рендера од телефонот. Според неговите тврдења, Samsung би можел да го понуди Galaxy S27 Ultra во две различни големини, што досега никогаш не било случај.
Сепак, засега не е сигурно дека Galaxy S27 Ultra навистина ќе изгледа вака. Претходно се појавија информации дека Samsung подготвува хоризонтално поставен модул за камерите, што значително се разликува од она што го прикажуваат најновите рендери.
